«Մեկ ուղղում անեմ: Այդ մասին հրապարակվել է երեկ, բայց որոշումը շատ ավելի վաղ է եղել»,-լրագրողների հետ զրույցում այսօր անդրադառնալով փաստին, որ ինքը հրաժարվել է պատգամավորական մանդատից, ասաց Արցախի գործող ԱԺ նախագահ Աշոտ Ղուլյանը: «Պարզապես հասկանալով, որ մոտենում ենք նոր խորհրդարանի ձեւավորմանը, անհատական կազմին, երեկ տարածեցինք տեղեկատվությունը, որ ավելորդ բաներ չլինեն, չնայած՝ ասեկոսեներից խուսափել չի լինում: Բայց դիմումս կա, ամսաթիվն էլ՝ վրան: Կուզենայի, որ որեւէ բան այստեղ չփնտրենք»,-հորդորեց Աշոտ Ղուլյանը:
Նա շեշտեց՝ դեռեւս Արցախի նախագահական եւ խորհրդարանական ընտրությունների քարոզարշավում ասել է՝ հաջորդ գումարման ԱԺ-ում ամենայն հավանականությամբ չի լինելու. «Սերնդափոխությունն ամեն նոր խորհրդարանում պետք է լինի, եւ դա միայն տարիքով չի սահմանափակվում»:
Ինչ վերաբերում է մամուլի տեղեկություններին, որ ինքը հավակնում է Արցախի ԱԳ նախարարի պաշտոնին, Ղուլյանը շեշտեց. «Հասկանալի է, որ հանրության շրջանում բնական հետաքրքրություն կա նոր կառավարության անհատական կազմի հանդեպ, եւ դա նորմալ է: Մյուս կողմից, անհասկանալի է, որ այս հետաքրքրության խորքում կան այս կամ այն պաշտոնի հետ կապված միտումնավոր մրցակցային ուղղորդումներ: Փորձում եմ հասկանալ, թե որտեղից դրանք կարող են լինել: Երեւի՝ տեղեկատվական մրցակցությունն էլ է քաղաքական կյանքի շարունակությունից մեկը, բայց, ովքեր ինձ ճանաչում են, պետք է չտրվեն նման մտավարժանքների: Իսկ ովքեր չեն հասկացել նորընտիր նախագահի աշխատաոճը, նույնպես կարող են նման ենթադրություններ անել: Իհարկե, ԱԳ նախարարի պաշտոնում նշանակվելու լուրերն ավելի շատ կապված են նախկինում գործադիրում իմ զբաղեցրած պաշտոնի հետ, բայց, միանշանակ, այս հարցում որեւէ բան չենք կարող կոնկրետ ասել»:
Ղուլյանը հավելեց՝ հանդիպել է Արցախի ընտրված նախագահ Արայիկ Հարությունյանի հետ եւ պայմանավորվածությունն այսպիսին է՝ կադրային եւ գործակցության մասին հարցերին անդրադառնալու են մայիսի 21-ից հետո, երբ Արայիկ Հարությունյանը կստանձնի պաշտոնը:
Կարդացեք նաև
Լուիզա ՍՈՒՔԻԱՍՅԱՆ
