Արտակարգ դրության խիստ սահմանափակումները մայիսի 4-ից պարետատունը բավականին մեղմացրեց. քաղաքացիների տեղաշարժի համար թերթիկներն այլեւս պարտադիր չէին, բացվեցին ռեստորանները, սրճարանները, հագուստի խանութներն ու կարելի է ասել, տնտեսության գրեթե բոլոր տեսակների վրայից արգելքը հանվեց:
Սահմանափակումների մեղմացման հետ պայման էր դրված՝ պահպանել նոր կորոնավիրուսի համավարակի տարածումը կանխարգելող կանոնները՝ պահպանել սոցիալական հեռավորություն, կրել պաշտպանիչ դիմակներ եւ ձեռնոցներ, պարբերաբար ախտահանել ձեռքերը եւ այլն:
Սրանից տաս օր հետո վարչապետ Փաշինյանն անձամբ արձանագրեց՝ քաղաքացիները նշված կանոնները չեն պահպանում:
Երեկ վարչապետն ուղիղ եթերում ասաց. «Ես այսօր տեսնում եմ իրար ձեռքով բարեւող մարդկանց, իրար շատ մոտ (չեմ ուզում ասել իրար քիթ մտած) մարդկանց, եւ սա մեծ խնդիր է: Այս տեմպերով մենք շատ լուրջ ճգնաժամի առաջ կարող ենք կանգնել…Եթե այս տեմպերով գնանք եւ նոր հիվանդացության դեպքերը այս տեմպով ավելանան, մենք նորից ստիպված ենք լինելու գնալ սահմանափակումների»:
Փաշինյանն առաջին անգամ չէ, որ ուղիղ եթերով կոչ է անում պահպանել կանոնները, երեկ նույնպես նման կոչ արեց, նշելով՝ անհատական պատասխանատվությամբ բոլորս կարող ենք այս իրավիճակից խուսափել:
Կարդացեք նաև
Քաղաքացիների պատասխանատվության վրա, կարծես թե հույս դնել պետք չէ. Համենայնդեպս սահմանափակումների մեղմացումից հետո մայրաքաղաքի փողոցներում մեր տեսախցիկն արձանագրել է՝ խանութների եւ բանկերի հերթերում իրար քիթ մտած ու առանց դիմակների մարդկանց, սոցիալական հեռավորությունն էլ ոչ թե առնվազն մեկ մետր է, այլ ասենք՝ 10 սմ:
Մինչդեռ ամեն օր վարակակիրների թիվը հարյուրից ավելի է լինում: Կառավարությունն արդեն մտածում է վարչական պատիժները խստացնել, եւ գուցե այս դեպքում սեփական գրպանին չվնասելու համար քաղաքացիները պահպանեն սահմանված կանոններն ու գրպանի պարունակությունը:
Նելլի ԲԱԲԱՅԱՆ
«Առավոտ» օրաթերթ
14.05.2020
