Առողջապահության նախարարը արտակարգ դրության ռեժիմի երկարացման մասին. «Երեւի մի քիչ պետք է հիասթափեցնեմ»
Արտակարգ դրությունը մեկ ամսով երկարացնելու առիթով առողջապահության նախարար Արսեն Թորոսյանը ՖԲ ուղիղ եթերում նշեց, որ երկու կարեւոր բան պետք է հաշվի առնել: «Առաջին հանգամանքը կրկին սեփական պատասխանատվության զգացողության բարձրացում պետք է ունենալ, որ քաղաքացիները չլքեն իրենց ինքնամեկուսացման վայրերը: Երկրորդը, որ մեր մյուս քաղաքացիները օգնեն մեզ, որպեսզի վարակը չտարածվի այդ վայրերից, եթե նրանք հանկարծ լքեն իրենց բնակության վայրերը: Դրա համար ներդրվելու է նոր մեխանիզմ:
Աշխատելուն են 119 շրջիկ խմբեր՝ բժիշկ, ոստիկան եւ ԱԻՆ ներկայացուցիչ: Սակայն այդ հարցում մեզ պետք է բոլորի աջակցությունը, որովհետեւ եթե ինքնամեկուսացված քաղաքացիները լքեն իրենց ինքնամեկուսացման վայրերը, վտանգվում ենք բոլորս՝ նրանց հարեւանները, բակի բնակիչները, խանութը, որտեղ նրանք առեւտուր են անում եւ այլն: Հիմա մենք պետք է ավելի աչալուրջ լինենք: Մի քիչ հանգստություն կա մարդկանց մեջ, որ մենք հայտնաբերված բոլոր դեպքերին մինչ օրս իզոլացրել ենք եւ դա հանգստացրել է բոլորին:
Երեւի պետք է մի քիչ հիասթափեցնեմ, որ դա շատ երկար շարունակվել չի կարող, քանի որ դեպքերը շատանում են՝ նաեւ մեր վարքագիծը չշտկելու հետեւանքով: Մենք աշխարհի շատ հազվագյուտ երկրներից ենք, որոնք մինչ օրս բոլոր դեպքերը հոսպիտալացրել կամ իզոլացրել են փակ հաստատություններում եւ չեն վտանգել մյուս քաղաքացիներին»,-ասաց Արսեն Թորոսյանը:
Կարդացեք նաև
Աշոտ ՀԱԿՈԲՅԱՆ
