Ինչպես ավելի վաղ հայտնել էինք, ՀՀ-ում հանրային տրանսպորտը կգործի մայիսի 18-ից: ԱԺ հատուկ նիստում այսօր քննարկվում է ՀՀ-ում կորոնավիրուսի տարածմամբ պայմանավորված արտակարգ դրության երկարաձգման հարցը:
Հիշեցնենք, որ կառավարությունն այսօր որոշել է՝ արտակարգ դրությունը կգործի մինչեւ հունիսի 13-ը ներառյալ:
Պատգամավորներից ՀՀ պարետ Տիգրան Ավինյանից հետաքրքրվեցին՝ ի՞նչ սկզբունքով է տրանսպորտը գործելու: Ավինյանն ասաց, որ հանրային տրանսպորտը կաշխատի որոշակի կանոններով. «Առանց դիմակի մարդիկ չեն կարողանա հանրային տրանսպորտից օգտվել»:
Կարդացեք նաև
Տիգրան Ավինյանը նաեւ նշեց, որ կորոնավիրուսից մահերի թիվն ընդհանուր առմամբ հիմա ցածր է, բայց դա չի նշանակում, որ այդ թիվը չի կարող չեռապատկվել. «Օրական կարող ենք ունենալ 200 մահ, որոնցից հարյուրը՝ կորոնավիրուսի պատճառով: Առողջապահական կանոնների չպահպանումը կբերի նման հետեւանքների»:
Տիգրան Ավինյանը նաեւ նկատեց՝ կառավարությունում եւ խորհրդարանում էլ է վարակի տարածման դեպք եղել, ուստի այս փուլում ԱԺ նիստն ամենառիսկային բանն է, որը տեղի է ունենում ՀՀ-ում. «Բայց այն տեղի է ունենում, որովհետեւ այլընտրանք չկա, ուստի բոլորս պետք է ավելի զգոն լինենք եւ օրինակ ծառայենք քաղաքացիներին: Այո, պարտադիր պետք է կրել դիմակներ»:
Լուիզա ՍՈՒՔԻԱՍՅԱՆ
