Քրեակատարողական հիմնարկներում որեւէ դատապարտյալ եւ կալանավորված անձ, այս պահի դրությամբ, չի վարակվել կորոնավիրուսով: Այսօր այս մասին կառավարության մամուլի սրահում ասաց արդարադատության նախարար Ռուստամ Բադասյանը: Նրա խոսքով, քրեակատարողական հիմնարկներում իրականացվող միջոցառումներն իրենց արդյունքը տալիս են, սակայն այս իրավիճակը հնարավոր է փոխվի. «Կորոնավիրուսի տարածման տեմպերն ու հեշտությունը, անպայման, բերելու է մի իրավիճակի, երբ կունենանք նաեւ վարակված դատապարտյալ: Բայց սա չի նշանակում, որ որեւէ կատաստրոֆա կլինի, որովհետեւ մենք նաեւ դատապարտյալների հիվանդանոցում, արդեն վաղուց նախապատրաստել ենք հատուկ կահավորված երկու մասնաշենք, որտեղ արդյունավետ բուժումն ու վերահսկողությունը, մեկուսացումը հնարավոր կլինի ապահովել»:
Բադասյանն ասաց, որ քրեակատարողական հիմնարկներից Վարդաշենի Հրազդանի եւ Սեւանի ՔԿՀ-ների, աշխատակիցների մոտ է կորոնավիրուս հայտնաբերվել:
Ինչ վերաբերում է ՔԿՀ-ների ծանրաբեռնվածությանը, պարոն Բադասյանն ասաց, որ Հայաստանում այն 43 տոկոս է, մյուս երկրներում, որտեղ, կորոնովիրուսով պայմանավորված, հրատապ միջոցառումներ են իրականացվել՝ համաներմամբ ազատ արձակում եւ այլն, այդ երկրներում ծանրաբեռնվածությունը 100 տոկոսից ավելի է եղել. «Այս պահին քրեակատարողական հիմնարկն ամենաանվտանգ տեղն է կորոնավիրուսի տարածման առումով, որի մասին վկայում են թվերը, որ զրո դեպք ունենք կալանավորված եւ դատապարտված անձանց շրջանում»:
Կարդացեք նաև
Լուսինե ԲՈՒԴԱՂՅԱՆ
