ԱԺ հատուկ նիստում այսօր քննարկվում է ՀՀ-ում կորոնավիրուսի տարածմամբ պայմանավորված արտակարգ դրության երկարաձգման հարցը:
Հիշեցնենք, որ կառավարությունն այսօր որոշել է՝ արտակարգ դրությունը կգործի մինչեւ հունիսի 13-ը ներառյալ:
Արտակարգ դրության պարետ, ՀՀ փոխվարչապետ Տիգրան Ավինյանից ԲՀԿ պատգամավոր Միքայել Մելքումյանը հետաքրքրվեց. «Ասել էիք, որ ստացիոնար՝ հրատապ բուժման կարիք ունի 600 հիվանդ, եւ եթե թիվը հասնի 1500-ի, սահմանափակումները կվերականգնվեն: Այդ ինչո՞վ է պայմանավորված թիվը, առողջապահական համակարգո՞վ»: Ավինյանը պարզաբանեց. «600 թիվը թոքաբորբ ունեցողներին էր վերաբերում: Մեր մահճակալային ֆոնդը մոտ 2000 է: Ոչ բոլոր անձինք են, որ ունեն մահճակալի եւ ինտենսիվ բուժման կարիք»:
Տիգրան Ավինյանը վստահեցրեց. «Առողջապահական համակարգի կարողությունների առումով մեզ բավականին վստահ ենք զգում: Այս պահին ունենք մոտ հարյուր ինկուբացիոն՝ արհեստական շնչառության սարքեր, որոնցից վեցն են գործարկված: Այդ առումով մեր կարողություններն այս փուլում ավելի են, քան բավարար: Ամենակարեւորը, որ արել ենք, առողջապահական համակարգի կարողությունների զարգացումն է, որը շարունակական է: Այն թույլ է տալիս վստահորեն գնալ որոշ սահմանափակումների նվազեցմանը, որովհետեւ տարածման ամբողջական մարումը դժվար գործընթաց է: Անգամ վարակի մարելուց հետո որոշակի պահի բռնկումները հնարավոր են, ինչպես որոշ երկրների փորձն է ցույց տվել: Իսկ վարակի տարածման առումով միջինից լավ ցուցանիշ ունենք: Հիվանդները բուժվում են, նորերն են հիվանդանում, եւ այս գործընթացը կառավարելի է»:
Կարդացեք նաև
Լուիզա ՍՈՒՔԻԱՍՅԱՆ
