Ռուսաստան վերադառնալ ցանկացող հայերին աջակցող իրավապաշտպան Դավիթ Հարությունյանի հետ զրույցի ընթացքում կառավարության շենքից դուրս եկավ եւ մեզ մոտեցավ վարչապետ Նիկոլ Փաշինյանը: Դատելով ծավալված զրույցից՝ վարչապետը ծանոթ էր խնդրին:
Մոտենալով՝ Նիկոլ Փաշինյանը նախ իրավապաշտպանին եւ նրա հետ եղած մարդկանց դիտողություն արեց, որ պաշտպանիչ դիմակ չեն կրում (Aravot.am-ը պահպանում է պարետատան սահմանած կանոնները), ապա ասաց. «Ես էլ եմ ձեզ շատ սիրում, բայց անվտանգության կանոնները պետք է պահպանել: Ձեր խնդիրը գիտեմ, ձեզ հասկանում եմ, բայց դեռ հարցեր կան»:
Քաղաքացիները վարչապետին եւս մեկ անգամ հիշեցրին, որ Ռուսաստան վերադառնալ ցանկանում է մոտ 300 հոգի, եւ նրանք պատրաստ են տրամադրել 87 անձնական մեքենա եւ իրենց միջոցներով հոգալ ծախսերը:
Իրավապաշտպան Դավիթ Հարությունյանը, դիմելով վարչապետին, ասաց. «Խնդրում ենք՝ խոսեք Վրաստանի հետ: Սա դիվանագիտական խնդիր է: Եթե մեր արտգործնախարարը լավ դիվանագետ է, հարցը կկարողանա գլուխ բերել: Բայց, տեսնում ենք, որ միայն դուք կարող եք լուծում տալ»:
Կարդացեք նաև
Ներկաներից մեկն էլ վարչապետին տեղեկացրեց, որ կինն ու երեխաները մնացել են Ռուսաստանում, եւ խնդիրը օդում կախված մնալու պատճառով արդեն ընտանիքի հիմքերն են խարխլվում»:
Aravot.am-ը վարչապետից հետաքրքրվեց. «Պարոն Փաշինյան, չե՞ք հորդորում, որ մեր այս հայրենակիցները Հայաստանից հեռանալու փոխարեն իրենց ընտանիքները վերջնականապես վերադարձնեն հայրենիք», ինչին վարչապետը պատասխանեց. «Ինչպե՞ս չենք հորդորում: Ռուսաստանում բավականին շատ հայաստանցի ունենք, որոնք գալիս են: Վստահ եմ, որ իրենք էլ կգան»:
Աշոտ ՀԱԿՈԲՅԱՆ
