ՀՀ կենտրոնական բանկի դիմաց այսօր «Ոչ վարկային թալանին» նախաձեռնության մասնակիցներից Մանուել Մանուկյանը, որը ցույցի նախաձեռնողներից է, կրկին բերման է ենթարկվել ոստիկանություն: Ցուցարարները լրագրողների հետ զրույցում առաջիկա անելիքների մասին խոսել չցանկացան, ասացին, որ Մանուել Մանուկյանը բաց թողնվելուց հետո կխոսի:
Նշենք, որ վարկային տոկոսադրույքների նվազեցման եւ մի շարք այլ պահանջներով գրությունները ԿԲ-ին հանձնելուց հետո այսօր ցուցարարները հեռացել էին ԿԲ-ի դիմացից, քանի որ ոստիկանությունը, հաշվի առնելով արտակարգ դրության պայմանները, ժամանակ էր տվել՝ հեռանալու համար:
Մանուել Մանուկյանի եղբայրը՝ Սամվելը (լուսանկարում), News.am-ի հետ զրույցում պատմել է. «Ոստիկաններն ասացին, որ ժամանակը սպառվել է, եւ տարան Մանուելին, առանց պատճառի: Այսօր նորմալ են տարել: Մանուելն ասել է, որ հավաք չի կազմակերպել, մյուսներն էլ այգում են եղել: Իսկ Մանուելը գնացել է, որ լրագրողներին գրությունները ներկայացնի, այդ ժամանակ էլ բերման է ենթարկվել»:
Սամվել Մանուկյանը վստահեցրեց, որ եղբայրը հավաք չի կազմակերպում, այլ ցույցի եկած ամեն քաղաքացի բանկերի հետ կապված իր խնդիրն է ուզում բարձրաձայնել:
Կարդացեք նաև
Հիշեցնենք, որ երեկ ցույցի մասնակիցների եւ ոստիկանների միջեւ քաշքշուկ էր տեղի ունեցել, բերման ենթարկվածներն ավելի ուշ բաց էին թողնվել:
Լուիզա ՍՈՒՔԻԱՍՅԱՆ
