«Իհարկե, մեր երկրում կան բազմաթիվ կանայք, որոնք պետք է հասկանան՝ իրենք իրավատեր են: Եթե նրանք չլինեին, մենք չէինք ընդունի ընտանիքում բռնության կանխարգելման մասին օրենքը: Այո, շատ կանայք չգիտեն իրենց իրավունքները»,-ԱԺ նիստում այսօր խոսելով ՄԻՊ տարեկան զեկույցի մասին՝ ասաց ԲՀԿ խմբակցության պատգամավոր Նաիրա Զոհրաբյանը:
Նա նշեց. «Ինձ դիմել էր կին, որի ամուսինը գրաֆիկով՝ օրվա ռեժիմով, ծխախոտը հանգցնում էր…այդ կինը վախենում էր դիմել ոստիկանություն, որովհետեւ հարեւանները կպատժեին: Այո, նման կնոջը պետք է բացատրել, որ նա իրավատեր է եւ քաղաքացի է նույնքան, որքան այդ սադիստը, որը պետք է լինի այնտեղ, որտեղ իր տեղն է»:
Զոհրաբյանը պատմեց, որ վերջերս մեկ այլ կին էր դիմել, որին թաքուն «օպերացիայով» առեւանգել ու հեռացրել են տնից. «Գիտե՞ք ինձ ով զանգեց ու փորձեց ահաբեկել: Ոչ թե այդ կնոջ ամուսինը, այլ մայրը՝ ասելով, թե ինչու եմ խառնվում, ինչու եմ քիթս խոթում իր աղջկա ընտանիք: Այդպես չպետք է լինի, նաեւ մտածելակերպ փոխելու խնդիր ունենք»:
Պատգամավորը շեշտեց, որ ըստ ոստիկանության տրամադրած վիճակագրության՝ չնայած օրենքի առկայությանը, շատ քիչ թվով կանայք են դիմում իրավապահների եւ բարձրաձայնում ֆիզիկական-հոգեբանական բռնության ենթարկվելու մասին:
Կարդացեք նաև
Ապա Նաիրա Զոհրաբյանն ամբիոնից ցույց տվեց բռնության ենթարկված կանանց դիմանկարները, ինչին տեղից բղավելով արձագանքեց «Իմ քայլի» պատգամավոր Վաղարշակ Հակոբյանն ու ինչ-որ բան ասաց ՄԻՊ զեկույցի մասին: Զոհրաբյանը պատասխանեց. «Ես կանանց մասին էի խոսում, ոչ թե ձեր, եւ խնդրում եմ՝ բացարձակ մի ոգեւորվեք»:
Պատգամավորն այնուհետեւ հրավիրեց ոստիկանության ուշադրությունը. «Մի քանի ԶԼՄ-ներ դիմել են ինձ եւ հայտնել, որ ոմն անձ, որի հեռախոսահամարը պարզված է, զանգում եւ լրագրողներին սպառնում է, սեռական բնույթի հայհոյանքներ հնչեցնում: Կարծում եմ՝ ԶԼՄ-ներն արդեն դիմել են իրավապահներին»:
Լուիզա ՍՈՒՔԻԱՍՅԱՆ
