«Իմ քայլը» խմբակցության պատգամավոր Վաղարշակ Հակոբյանն այսօր բավականին կոշտ ու բարձր տոնով գնահատեց մարդու իրավունքների պաշտպանի՝ 2019թ.-ի տարեկան զեկույցը, որը ներկայացվում է ԱԺ նիստում: Նրա խոսքով՝ զեկույցում շատ թերություններ եւ ոչ ամբողջական նկարագրություններ կան: «Կանանց իրավունքների մասին ավելի համապարփակ պետք է խոսեիք, ոչ թե երկու տողով»,-դիմելով ՄԻՊ Արման Թաթոյանին՝ ասաց պատգամավորը:
Հակոբյանին չի գոհացրել նաեւ, իր խոսքով, ՄԻՊ-ի անտարբերությունը՝ ՀՀ-ում տիրող բարոյահոգեբանական մթնոլորտի վերաբերյալ. «Երկու տարի շարունակ իշխանությունը եւ նրա առանձին մարդիկ ամենօրյա ռեժիմով ենթարկվում են տեռորի, հոգեբանական բռնության, էլ չասեմ, թե կանանց մասին ինչ են խոսում, ինչ տեռորի են ենթարկում իշխանական կանանց, իսկ ձեր գնահատականը զրոյական է: Ես այստեղ միտում եմ տեսնում: Դուք աշխատել եք այս իշխանությունից առաջ եւ հիմա, եւ այս իշխանությունը միակ լեգիտիմ իշխանությունն է, որի օրոք դուք աշխատում եք»:
Ըստ պատգամավորի՝ Արման Թաթոյանը երկակի չափանիշներով է աշխատում. «Ինչպե՞ս է լինում, որ դուք կայծակնային արագությամբ արտահայտում եք վերաբերմունք՝ մեր գործընկերոջ ասածի մասին, բայց խորքային գնահատական չէք տալիս իրավիճակին: Ի՞նչ է, հակառակ կողմն իր համար նստած հաց ու սոխ էր ուտում, իսկ մեր գործընկերը եկավ ու վիրավորե՞ց…ես ձեզ խոհեմության եւ անաչառության կոչ եմ անում»:
Հիշեցնենք՝ Արման Թաթոյանը բացատրել էր, թե ինչու է արձագանքել ԱԺ փոխխոսնակ Ալեն Սիմոնյանի՝ ԼՀԿ պատգամավոր Անի Սամսոնյանին ուղղված արտահայտությանը եւ ինչու չի արձագանքել Էդմոն Մարուքյան-Սասուն Միքայելյան միջադեպին:
Կարդացեք նաև
Վաղարշակ Հակոբյանին զայրացրել է նաեւ այն փաստը, որ ՄԻՊ-ը չի արձանագրել քաղաքական մեծամասնության ներկայացուցչի հանդեպ բռնության գործադրմանը. «Ձեր կանոնադրությունում չկա կետ, որ նման դեպքերում դուք պետք է լռեք: Կիսով չափ որեւէ բանում ներգրավվելն անթույլատրելի է, եւ սա արժանանալու է հստակ քաղաքական գնահատականի»:
Լուիզա ՍՈՒՔԻԱՍՅԱՆ
