«Քննարկեցինք տեղի ունեցածը: Բնականաբար, կատարվածն անընդունելի է»,-լրագրողների հետ ճեպազրույցում ասաց ԱԺ փոխնախագահ Ալեն Սիմոնյանը:
Ինչպես հայտնել էինք, այսօր ԱԺ նիստի ընթացքում ծեծկռտուք էր տեղի ունեցել: Վիճել էին «Իմ քայլի» պատգամավոր Սասուն Միքայելյանն ու ԼՀԿ պատգամավոր Էդմոն Մարուքյանը, տասնյակ պատգամավորներ փորձում էին հանգստացնել նրանց: Միջադեպից հետո կառավարության ծրագրի կատարողականը ներկայացնելու համար խորհրդարան եկած վարչապետի եւ ԱԺ նախագահության մասնակցությամբ փակ քննարկում տեղի ունեցավ:
«Մենք պետք է մի բան արձանագրենք, որ այս ամենն անմիջական կապ ունի ավելի վաղ դահլիճում հնչած սեռական բնույթի հայհոյանքի, մեր ընդունած օրենքների հետ: Ակնհայտ է, որ այդ սադրանքներից հետո… սադրանքներին չպետք է տրվել, բայց մայիսի 8-ի օրով Սասուն Միքայելյանին սադրելը համարում եմ անընդունելի: Իրեն կլասիկ հռչակած պատգամավորն իրավունք չունի դահլիճում հայհոյանք հնչեցնել: Պնդում եմ, որ դա նախապատրաստված սադրանք է, որն ունի շարունակականություն: Այսինքն, իրավիճակը սկզբում դահլիճում լարվում է Անի Սամսոնյանի ելույթներով, որում օգտագործվում են «հիստերիկ» ու նման բառեր, հետո սադրելով խոսում է նա, ով օրերս սեռական բնույթի հայհոյանք հնչեցրեց»,-համոզմունք հայտնեց Ալեն Սիմոնյանը:
Այնուհետեւ Ալեն Սիմոնյանը հերքեց, որ վարչապետը մասնակցել է քննարկմանը, ասաց, որ ՔՊ վարչության անդամներով էին հավաքվել:
Կարդացեք նաև
Դառնալով Էդմոն Մարուքյանին՝ Ալեն Սիմոնյանը պնդեց, որ սադրանքի գործելաոճը նա օգտագործում էր նաեւ նորընտիր ԱԺ-ում՝ ԲՀԿ-ի դեմ. «Նա տեղից վեր է կենում եւ մոտենում: Դա արդեն իսկ ագրեսիվ պահվածք է: Մայիսի 8-ի օրով վրա քշեց Սասուն Միքայելյանին»:
Ինչ վերաբերում է կադրերում արձանագրված հանգամանքին, որ ծեծկռտուքի ժամանակ «Իմ քայլի» պատգամավորներ Արտակ Մանուկյանը եւ Վահե Ղալումյանը կողքից մեկական անգամ հարվածում են Մարուքյանին, Ալեն Սիմոնյանը նշեց. «Ես կադրերը տեսել եմ, Արտակ Մանուկյանը հետեւից չի հարվածում, իսկ Վահե Ղալումյանի նկատմամբ բռնություն է կիրառվել, ես տեսել եմ, երբ նա ընկել է, ոտքերով հարվածել են իրեն: Բայց ես եւ դուք քննիչներ չենք»:
Լուիզա ՍՈՒՔԻԱՍՅԱՆ
