«Ապօրինի գույքի բռնագանձման մասին օրենքի ընդունումից հետո ստանում ենք ազդակներ, որ այն անձինք, որոնք ենթադրաբար ունեն նման գույք, սկսել են այդ գույքի մաքրման գործընթաց: Այսինքն, կեղծ գնորդների միջոցով փորձում են ձեւակերպել այնպես, իբրեւ թե այդ գույքը վաճառում են բարեխիղճ գնորդների: Ի՞նչ կարող ենք անել, որպեսզի վաղը դատարանում չկանգնենք իրավիճակի առաջ, երբ պարզվի, որ նման գույքն ամիսներ առաջ վաճառվել է բարեխիղճ գնորդի, եւ չենք կարող այն վերադարձնել պետությանը»,-ՀՀ արդարադատության նախարար Ռուստամ Բադասյանին այսօր ԱԺ նիստում նման հարցադրում հղեց «Իմ քայլի» պատգամավոր Հայկ Սարգսյանը:
Բադասյանը նշեց. «Պետք է շնորհակալ լինենք նրանց, ովքեր այս պահին կեղծ պայմանագրեր են կնքում, որովհետեւ նրանք մեր աշխատանքը հեշտացնելու են: Նկատի ունեմ՝ պետության աշխատանքը, որովհետեւ բավականին լավ ապացույցներ են «հավաքում» վաճառվող գույքի մասին: Իրականում որեւէ բարեխիղճ ձեռքբերող առանց տարրական փաստաթղթերի ուսումնասիրության՝ նման գործարքի չի գնա, բայց նշեմ, որ փողերի լվացման ընթացակարգերով որոշակի աշխատանքներ տարվում են, որպեսզի նման ռիսկերը չեզոքացվեն»:
Լուիզա ՍՈՒՔԻԱՍՅԱՆ
