Կառավարությունը քննարկում է աղբավայրերի կոնսերվացիայի ծրագիր ունենալու հարցը. այդ ծրագիրն աշխատազուրկ քաղաքացիներին հնարավորություն կտա աշխատելու, իսկ զբոսաշրջային վայրերին, այդ թվում՝ Սեւանի ափամերձ հատվածքներին, աղբից ազատվելու: Այս մասին այսօր ԱԺ նիստում հայտարարեց Տարածքային կառավարման եւ ենթակառուցվածքների նախարար Սուրեն Պապիկյանը:
«Նախարարությունն առաջիկայում կներկայացնի միջոցառումը, քննարկումների արդյունքում պարզ կլինի իր իրագործումը»,-նշեց նախարարը:
Ինչ վերաբերում է աղբի վերամշակմանը, Սուրեն Պապիկյանի խոսքով՝ «Կոտայք-Գեղարքունիք» աղբավայրը պետք է կառուցվի, որը մոտ քսան տարի կկարողանա աղբ կուտակել, իսկ վերամշակող ընկերությունների հետ դեռեւս բանակցում են. «Ինչու չունենք տեսլական, թե որ վերամշակումն է մեզ համար կիրառելի, որովհետեւ ՀՀ-ում աղբի վերամշակմամբ զբաղվելու ցանկություն ունեցողները մի մեթոդ են առաջարկում, որը մեր համար միջավայրի աղտոտվածության խնդիրից ելնելով՝ ընդունելի չէ: Վերջնական որոշում չունենք այս պահին»:
Լուիզա ՍՈՒՔԻԱՍՅԱՆ
