Եվրոպան այնպիսի տնտեսական շոկ է ապրում, ինչպիսին չէր տեսել Մեծ դեպրեսիայի ժամանակներից ի վեր: Այս մասին Բրյուսելում հայտարարել է Իտալիայի նախկին վարչապետ, տնտեսության հարցերով եվրահանձնակատար Պաոլո Ջենտիլոնին:
Նրա խոսքով` Եվրամիությունը կորոնավիրուսի պատճառով հայտնվել է իր պատմության մեջ ամենախոշոր տնտեսական ռեցեսիայի մեջ: Եվրահանձնաժողովը կանխատեսում է, որ 2020թ. ԵՄ 27 անդամ երկրներում ՀՆԱ-ն կնվազի 7,4 տոկոսով, իսկ 2021-ին` կավելանա շուրջ 6 տոկոսով, ընդ որում տարբեր երկրների համար ցուցանիշները տարբեր են: Ակնկալվում է նաև, որ ԵՄ-ում կավելանա գործազրկության մակարդակը:
Քանի որ ԵՄ երկրները միլիարդավոր եվրոներ են ծախսում կորոնավիրուսի ճգնաժամին դիմակայելու համար, ԵՄ հանձնաժողովում սպասում են նաև բյուջեի դեֆիցիտի աճ. եվրոգոտում բյուջեի դեֆիցիտը կհասնի 8,5 տոկոսի` նախորդ տարվա 0,6 տոկոսի համեմատ: Ջենտիլոնիի խոսքով` եթե համավարակի դեմ պայքարն ավելի տևական ժամանակ և ավելի լուրջ ներդրումներ պահանջի, ապա պետք է սպասել տնտեսական ցուցանիշների էլ ավելի զգալի անկման:
Պատրաստեց՝ Վիկտորյա ԱՆԴՐԵԱՍՅԱՆԸ
