Freedom House միջազգային իրավապաշտպան կազմակերպությունը հրապարակել է ժողովրդավարական զարգացումների վերաբերյալ ամենամյա զեկույցը, որում Ադրբեջանը դասվել է ավտորիտար երկրների շարքին:
Զեկույցը շեշտում է, որ Ադրբեջանի նախագահ Իլհամ Ալիևն իշխանությունը ժառանգել է հորից 2003թ. տեղի ունեցած ընտրությունների արդյունքում, որոնք անցել են խիստ վերահսկողության պայմաններում, բայց այժմ էլ կան նախանշաններ, որ իշխանության փոխանցումը տեղի կունենա ընտանիքի ներսում:
«Վերջին տարիներին Ալիևն իշխանության վերին էշելոններում իրականացնում է փոփոխություններ՝ հիմնականում հօգուտ իր կնոջ… Տնտեսական անկման և կլանային քաղաքականության աճի պայմաններում հանրային աջակցությունը կորցրած Ալիևը հեռացնում է «հին գվարդիայի չինովնիկներին»՝ փորձելով նվազեցնել վերնախավի ներսում դավադրության հնարավորությունը: Իշխանությունից հեռացված պաշտոնյաները հանդես էին գալիս ընդդեմ Ալիևի կնոջ կամ առնվազն հավատարիմ չէին նրան… Եթե ապագայում Ալիևը հրաժարական տա, ապա Մեհրիբան Ալիևան կգլխավորի իշխանությունը, որը բաղկացած է իր կողմնակիցներից»,-ասված է զեկույցում, որը նվիրված է հետխորհդային եվրասիական 29 երկրներում ժողովրդավարական զարգացումներին:
Նշվում է նաև, որ ոչ միայն Ադրբեջանի, այլև Տաջիկստանի և Թուրքմենստանի նախագահներն իրենց հարազատներին նշանակում են պատասխանատու պաշտոնների՝ հող նախապատրաստելով ընտանիքի ներսում իշխանության փոխանցման համար:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
