«Իմ քայլը» խմբակցությունը վերջին շրջանում պարբերաբար նիստեր է անում, որոնք տեւում են 3-4 ժամ: Այսօր ԱԺ-ում լրագրողները խմբակցության ղեկավար Լիլիթ Մակունցին հարցրեցին՝ այդ տեւական նիստերի ժամանակ մանդատների հա՞րցն եք քննարկում, որի մասին մամուլում հրապարակումներ կան, քննարկե՞լ եք Վարդան Աթաբեկյանի, Աննա Կարապետյանի մանդատները վայր դնելու հարցը: Մակունցը պատասխանեց. «Նախ, վարչության նիստերը սովորաբար տեղի են ունենում երեքշաբթի օրերին, իսկ հաճախականությունը պայմանավորված է տարբեր թեմաներով որոշումներ կայացնելով: Դա կարող է լինել կորոնավիրուսին առնչվող իրավիճակի առումով, թե այլ: Ինչ վերաբերում է երկրորդ հատվածին, կուսակցությունում, «Իմ քայլը» խմբակցությունում պարբերաբար քննարկվում են կարգապահական տարբեր բնույթի հարցեր, իսկ թե այդ հարցերը այս փուլում ինչին են առնչվում, թույլ տվեք չհրապարակել, որովհետեւ դրանք ներքին հարցեր են: Չեմ հրապարակի ոչ միայն կարգապահական բնույթի, տեսակի վերաբերյալ, նաեւ անուններ չեմ հնչեցնի»:
Ճշտեցին՝ մենք կարո՞ղ ենք ենթադրել, որ որեւէ կարգապահական խնդիր են առաջացրել այս պատգամավորները՝ Մակունցը պատասխանեց. «Ես նախ պատգամավորների անուններ չհնչեցրի ու խնդրում եմ իմ արձագանքը չընկալել՝ որպես հաստատում ձեր հարցի: Տարբեր բնույթի հարցեր, այդ թվում՝ կարգապահական հարցեր քննարկելը խնդիրների մասին չի խոսում, այլ այն մասին, որ մենք շատ աչալուրջ ենք բոլոր տեսակի հարցերի նկատմամբ ու դրանց տալիս ենք արագ ու շուտափույթ լուծում»:
Լրագրողները փոխանցեցին՝ Վարդան Աթաբեկյանն ասել է, որ ճիշտ է, ինքը նման քննարկման ներկա չի եղել, բայց եթե անգամ ստիպեն մանդատը վայր դնել, դա հակասահմանադրական է եւ ինքը չի գնա այդ քայլին՝ Մակունցն արձագանքեց. «Տարբեր բնույթի կարգապահական հարցեր կարող են քննարկվել վարչությունում, որեւէ անուն չեմ հնչեցնում, չեմ հաստատում ու չեմ հերքում որեւէ բան: Ավել տեղեկատվություն հաղորդել չեմ կարող, որովհետեւ դա առնչվում է ներքին հարցերին: Եթե լինի այնպիսի տեղեկատվություն, որը հրապարակման ենթակա լինի, մենք, իհարկե, կհրապարակենք»:
Հռիփսիմե ՋԵԲԵՋՅԱՆ
