Լոռու մարզի Ծաթեր գյուղում այսօր հուղարկավորեցին նախօրեին շան հարձակումից հետո մահացած 78 ամյա կնոջը: Վերջինս, ըստ Ծաթեր վարչական շրջանի ղեկավար Բագրատ Ղալայանի, այս տարեսկզբից տեղափոխվել էր աղջկա ու փեսայի հետ ապրելու:
«Այդ կինը մեր համայնքի բնակիչ չէր, Ձորագետ գյուղի բնակիչ էր, փեսայի տանն էր մնում, հիվանդ կին էր, աղջիկն ու փեսան ասում էին՝ անկողնային է, բայց դեպքի օրը երկու փայտով դուրս է եկել, շունն էլ կապից արձակվել ու հարձակվել է այդ կնոջ վրա: Շունն այդ կնոջ դեմքի վրա էր հարձակվել: Հունվարից այդ կինն այստեղ էր, փեսան ու աղջիկն էին պահում, այդ մի աղջիկն ուներ, փեսան էլ, աղջիկն էլ մտավոր խնդիրներ ունեն»,-Aravot.am-ին ասաց Բագրատ Ղալայանը:
Մեր զրուցակիցն ասաց, որ մահացածի հարեւաններն էլ են հաստատել, որ իսկապես շունն է հարձակվել կնոջ վրա ու գզել. «Իրենց ասելով՝ երեկոյան 7-8-ն ընկած ժամանակահատվածում է տեղի ունեցել դեպքը, բայց աղջիկն ու փեսան հաջորդ օրն են տեսել, որ մահացել է: Շան գզելուց հետո փեսան է այդ կնոջը գրկած բակից տուն բերել, ես տեսել եմ՝ շորերի վրա արյան հետքեր կային, ըստ մահացածի աղջկա՝ գիշերը մայրը ջուր է ուզել, հիվանդանոց չեն տեղափոխել, պառկացրել են մահճակալին: Չեմ կարող ասել՝ ինչու հիվանդանոց չեն տեղափոխել, երեւի հնարավորություն չեն ունեցել կամ չեն հասկացել»:
Արփինե ՍԻՄՈՆՅԱՆ
Կարդացեք նաև
Լուսանկարը՝ shamshyan.com կայքից
