«Կառավարությունը կոլեգիալ մարմին է, եւ որոշումները հաճախ ընդունվում են կոնսենսուսով, երբեմն՝ քվեարկությամբ: Կառավարության մեկ անդամի կարծիքը միշտ չէ, որ վերջնական որոշման հիմք է դառնում»,-լրագրողների հետ զրույցում այսօր անդրադառնալով մամուլում առկա տեղեկություններին, որ ինքը դեմ է եղել մայիսի 4-ից ՀՀ-ում տեղաշարժման եւ տնտեսական գործունեության սահմանափակումների վերացմանը՝ ասաց ՀՀ առողջապահության նախարար Արսեն Թորոսյանը: Նա փաստեց. «Եթե նեղ մասնագիտորեն նայեմ, ապա այո, մեզ համար ցանկալի էր, որ սահմանափակումները երկար մնային, բայց արդյոք պետությունը կարո՞ղ է երկար ապրել սահմանափակումների ռեժիմով»:
Թորոսյանի խոսքով՝ այդ հարցի պատասխանը միայն ինքը չէ, որ պետք է տա. «Պատասխանն է՝ ոչ, չի կարող: Եթե սահմանափակումները շարունակվեին, ինձ հարցնելու էիք՝ որքա՞ն կկարողանա պետությունն ապրել սահմանափակումների պայմաններում… Պատասխանն էլ նույնն էր լինելու: Արտակարգ դրության ռեժիմը թույլ է տալիս սահմանափակումներն անհրաժեշտության դեպքում թուլացնել կամ խստացնել, ինչի հավանականությունը միշտ կա: Չի բացառվում, որ արտակարգ դրության ռեժիմը երկարի, բայց մնա սահմանափակումների թույլ ռեժիմ»:
Մեկնաբանելով գնահատականները, որ սահմանափակումների վերացմամբ իշխանությունը պատասխանատվությունն իր ուսերից գցել է քաղաքացիների վրա, նախարարը նկատեց. «Նայեք, թե վերջին երեք ամսում ինչ է արել եւ անում կառավարությունը: Այն երբեք պատասխանատվություն չի գցում ուրիշների վրա, այլ համատեղ ջանքերով է աշխատում, անում ամեն ինչ, որ պետությունն ու ժողովուրդը հնարավորինս բարեկեցիկ ապրեն այս նոր ստեղծված իրավիճակում»: Հարցին՝ «ի՞նչ երաշխիք կա, որ հույսը պետք է դնել մարդկանց քաղաքացիական գիտակցության վրա», Արսեն Թորոսյանն այսպես արձագանքեց. «Ոչ մի երաշխիք չունեմ, երաշխիքներով չպետք է առաջնորդվել: Նպատակ ենք դնում եւ հասնում դրան»:
Լուիզա ՍՈՒՔԻԱՍՅԱՆ
