«Առաջինը, որ վտանգի տակ ենք դնելու, մեր հարազատներն են»,- ՀՀ վարչապետ Նիկոլ Փաշինյանի և ՀՀ փոխվարչապետ Տիգրան Ավինյանի հետ ֆեյսբուքյան զրույցում հայտարարեց ՀՀ առողջապահության նախարար Արսեն Թորոսյանը:
Նա նշեց՝ եթե պատասխանատու վարքագիծ չդրսևորենք, առաջինը վտանգելու ենք մեր հարազատներին: Նախարարն ասաց՝ հնարավոր չէ բոլորին հետևել՝ արդյոք մեկ- մեկուկես մետր հեռավորություն պահե՞լ է, թե՝ ոչ, կամ ձեռքերը ախտահանե՞լ է կամ արդյոք ձեռքերը հեռո՞ւ է պահում երեսից:
Խոսելով վերջին օրերին՝ կորոնավիրուսով հիվանդացության բարձր ցուցանիշների մասին՝ Արսեն Թորոսյանն ասաց. «Դա պայմանավորված է տարբեր գործոններով: Մենք ունեցել էինք շարժունակության մեծացում, պայմանավորված էր որոշակի օջախանման դեպքերով, երբ տեսնում ենք՝ կանոնները չեն պահպանվել այնքան, որ հնարավոր լիներ կանխարգելել թե′ հավաքատեղիներում, թե′ արտադրամասերում վարակի տարածումը: Ցավոք, մենք դեռ շարունակում ենք դեպքեր արձանագրել մի հուղարկավորության արարողությունից»:
Արսեն Թորոսյանն ասաց՝ այսօրվա դրությամբ արդեն 65 ծանր դեպք ունենք, 35 ծայրահեղ ծանր, իննին միացված է թոքերի արհեստական շնչառական սարք: Նախարարը հավաստիացրեց՝ այս պահին մեր առողջապահական համակարգը կարող է ակտիվ երեքից չորս հազար դեպք վարել միաժամանակ:
Կարդացեք նաև
Տիգրան Ավինյանն ու Արսեն Թորոսյանը տեղեկացրին, որ ստեղծված են պրոտոկոլներ արտադրամասերում, գրասենյակային միջավայրում աշխատանքների կազմակերպման համար, նման պրոտոկոլներ կան բոլոր ոլորտների համար:
Նիկոլ Փաշինյանը զրույցի ընթացքում հարցրեց՝ ենթադրենք հիմա մեր երեքից մեկը վարակակիր է, այս խոսակցության ընթացքում վարակը կտարածվի՞: Մենք հիմա նստած ենք ուղիղ եթերում. համաճարակային առումով ճի՞շտ ձևով ենք նստած, Արսեն Թորոսյանը պատասխանեց. «Մոտավորապես այո: Եթե փակ տարածքում էլ նստած լինեինք, մեր հեռավորությունը բավարար է: Եթե նույն մակերեսներին չդիպչենք, ինձ մոտ եղած վիրուսը չի տարածվի, ապա մենք գրեթե իրար վարակելու շանս չունենք»:
Նիկոլ Փաշինյանը հստակեցրեց՝ եթե նույն մակերեսներին չդիպչենք, մեր քիթը, բերանը աչքերը չշոշափենք, ապա վարակի տարածումը բացառվում է: Իսկ հազացող կամ փռշտացողը պետք է հատուկ կանոններով փակի բերանը, քիթը ու ամփոփեց. «Ձեռքերի ախտահանելն ամենաառանցքային գործիքն է վարակը կանխարգելելու»:
Զրույցի ընթացքում անդրադարձ կատարվեց, թե ինչպե՞ս պետք է բացառել սրճարաններում վարակի տարածումը: Արսեն Թորոսյանն ու Տիգրան Ավինյանը նշեցին, որ այդ բոլոր կանոնները նշված են պրոտոկոլների մեջ, որ սրճարաններում սպասարկեն դիմակով, ձեռնոցով, նաև խոսվեց մեկանգամյա օգտագործման սպասքի անհրաժեշտության մասին:
Արսեն Թորոսյանն այս առիթով ասաց. «Ինչպես ՀԴՄ ենք պահանջում, այնպես էլ պահանջենք դիմակներով ու ձեռնոցներով լինեն»:
Նիկոլ Փաշինյանը հետարքրքվեց՝ ո՞նց ենք վերահսկելու, Տիգրան Ավինյանը պատասխանեց. «Արդյունավետ վերահսկողության համար քաղաքացիները պետք է այդ գործընթացի մեջ ներգրավված լինեն: Մեր հիմնական գործիքը տեսչական մարմիններին են, բայց միանշանակ քաղաքացիների կողմից իրականացվող վերահսկողությունն ամենաարդյունավետն է: Տնտեսվարողներին ձեռնտու է այդ կանոններին հետևելը, քանի որ նրա համար մեծ խնդիր է դառնում պոտենցիալ փակման խնդիրը»:
Նաև նշեց, թե օգտակար կլինի այն, որ օրինակ, եթե քաղաքացին տեսնում է, որ այս կամ այն սրճարանում սպասարկում են առանց դիմակ և ձեռնոց, նկարի և տեղադրի համացանցում, որպեսզի մարդիկ իմանան, այդ սրճարան չգնան:
Տիգրան Ավինյանն ասաց, որ մոլերը բացվեն, պարտադրելու են դիմակ և ձեռնոց կրել աշխատակիցներին:
Տաթև ՀԱՐՈՒԹՅՈՒՆՅԱՆ
