Արցախի հանրապետությունում այս պահի դրությամբ ստացիոնար բուժում են անցնում նոր կորոնավիրուսի վարակով վարակված երկու հիվանդ, վեց հիվանդ բուժվել է, ընդհանուր առմամբ 287 անձ է թեսթավորված:
Այս մասին այսօր Արցախի միասնական տեղեկատվական շտաբում կայացած մամուլի ասուլիսում հայտարարեց ԱՀ առողջապահության նախարարության աշխատակազմի պետական հիգիենիկ և հակահամաճարակային տեսչության պետ Օֆելյա Հարությունյանը:
«Մենք անում ենք ամեն հնարավորը, որ վիճակագրությունն Արցախում բացասական զարգացում չունենա»,- ասաց բանախոսը` այդ առումով բավական դրական եւ համակարգված գնահատելով Արցախի հանրապետության ոստիկանության եւ արտակարգ իրավիճակների նախարարության համակարգված աշխատանքը`կանխարգելիչ միջոցառումների եւ արդյունավետ վերահսկողություն իրականացնելու առումով, թե հանրապետության ներսում, թե հանրապետության սահմաններին:
Հարցին`վերջին երկու օրերի ընթացքում հիվանդության նոր դեպքեր չկան, արդյո՞ք Արցախում հաղթահարում ենք իրավիճակը, բանախոսը պատասխանեց, որ իրավիճակը վերահսկելի, կառավարելի է, կայուն է, բայց դա դեռ չի նշանակում, որ կարանտինից պետք է դուրս գալ. «Բնակությունը պետք է շարունակի կանխարգելիչ բոլոր միջոցառումները պահպանել, շարունակել հետեւել պարետի ցուցումներին»:
Կարդացեք նաև
ԱՀ ոստիկանության անձնագրային և վիզաների վարչության պետ, ոստիկանության գնդապետ Ջիվան Ղահրամանյանն էլ ասաց, որ սահմանային անցակետերում վերահսկողություն իրականացնող ոստիկաններն ապահովվել են անհրաժեշտ համապատասխան հանդերձանքով, իրականացվել է խստացված վերահսկողություն: Ոստիկանության չորս ծառայող մեկուսացվել են`կորոնավիրուսի հնարավոր վարակակիրների հետ շփված լինելու կասկածով:
Ինչ վերաբերվում է Արցախի հանրապետությունում ելումուտի կարգի մեղմացման մասին հարցին ոստիկանության ներկայացուցիչը պատասխանեց, որ պարետի համանման հրահանգ դեռեւս չունեն:
Նելլի ԳՐԻԳՈՐՅԱՆ
