Aravot.am-ը «Քաղաքացիական պայմանագիր» կուսակցության նախկին անդամ (նա այս կուսակցության համահիմնադիրներից է) Շիրակի պետական համալսարանի դասախոս Արթուր Համբարձումյանից հետաքրքրվեց, թե հաջողվե՞ց արդյոք ՀՀ կառավարության հայտարարած արտակարգ դրության ժամանակ կանխարգելել վիրուսի տարածումը, Պարետը կարողացա՞վ այնպես անել, որ քաղաքացիներին ենթարկվեն իր հրամաններին:
Հիշեցնենք, որ մայիսի 4-ից հանվում են որոշակի սահմանափակումներ, մասնավորապես կվերանա մարդկանց ազատ տեղաշարժի սահմանափակումը, կգործեն բացօթյա տարածք ունեցող ռեստորանները, սրճարանները, վարսավիրանոցները կանցնեն բնականոն աշխատանքի։
«Արտակարգ դրության պայմաններում երևի առաջին հերթին իշխանության ներկայացուցիչները պետք է դրսևորեին մաքսիմալ զսպվածություն, բայց ի՞նչ տեսանք․․․
Նախ, հիշեցնեմ, որ այսօր տարածվեց այն տեղեկությունը, որ կառավարության շենքում ՀՀ պարետի հետ ռազբորկա է տեղի ունեցել, այն պարետի, ում հրամաններին արտակարգ դրության պայմաններում պիտի ենթարկվի նաև ՀՀ վարչապետը: Կարծում եմ այս միջադեպը լավագույնս ներկայացնում է Հայաստանում տիրող իրավիճակը, բայց թվարկենք ևս մի քանի դեպքեր, որոնք տեղի են ունեցել այս ընթացքում։
Կարդացեք նաև
Հայաստանում երբեք որևէ նախարար՝ գործադիր իշխանության բարձր ներկայացուցիչ չի հայտարարել, որ չի ենթարկվելու դատական իշխանության կայացրած ակտերին: Զավեշտն այն է, որ այն ոչ միայն տեղի ունեցավ, այլև տեղի ունեցավ արտակարգ դրության պայմաններում:
Հայաստանում նախկինում ոչ մի անգամ ԱԺ-ի ոչ մի փոխխոսնակ փողոցում կամ այլուր մարդկանց դեմքերը չի ջարդել, բայց այն տեղի ունեցավ ու տեղի ունեցավ իրենց իսկ հայտարարած արտակարգ դրության պայմաններում:
Մի քանի օր առաջ իշխանությունների բացարձակ ամենաթողության պայմաններում տեղի ունեցավ Գավառի սահմռկեցուցիչ դեպքը:
Իշխանությունների կողմից երբևէ նման ցինիկ ու գռեհիկ պահվածք չէր եղել հայ հոգևորականների նկատմամբ: Դա տեղի ունեցավ արտակարգ դրության պայմաններում:
Կառավարության ներկայացուցիչներն ու սովորական ոստիկաններն այդպես էլ չկարողացան հանրությանը բացատրել, թե ՀՀ քաղաքացիներից պահանջվող լրացման ենթակա թուղթն ինչպես և ինչքանով է նվազեցնում վարակի տարածման ռիսկերը:
Հայաստանում՝ երկրի ղեկավարի ներկայությամբ համակուսակիցները կամ այլ պաշտոնյաներ երբեք բռնցքամարտի չեն բռնվել: Ցավալի է նաև, որ վարչապետն արդեն այնքան է կորցրել իր հեղինակությունը իր իսկ թիմում, որ ստիպված է եղել վիճակն հանդարտեցնելու համար հրավիրելու անվտանգության աշխատակիցներին:
Ցավոք սրտի, ունեինք իշխանություն, որը որդեգրել էր մարդկանց բաժանելու, սև ու սպիտակ անելու, մարդկանց բանտերում փակելով վախեցնելու քաղաքականությունը, և փոխանակ արտակարգ դրության պայմաններում, կոմպլեքս նպատակային սոցիալական ու տնտեսական հաշվարկված քայլեր կատարեր՝ շարունակեց որդեգրածը և որպես այս ամենի բացասական արդյունք՝ Հայաստանի սոցիալ- տնտեսական այս ծանր վիճակը, համավարակի այս աստիճան տարածումը․․․»,-ասաց Արթուր Համբարձումյանը։
Նունե ԱՐԵՎՇԱՏՅԱՆ
Լուսանկարը՝ Արթուր Համբարձումյանի ֆեյսբուքյան էջից
