«Հայելի» ակումբի վրա հարձակման դեպքով հարուցված քրեական գործը նախաքննությունից 7 ամիս անց կկարճվի: Այսօր այս մասին «Հայելի» ակումբում լրագրողներին հայտնեցին ակումբի ղեկավար Անժելա Թովմասյանն ու նրա ներկայացուցիչ Զարուհի Փոստանջյանը:
Անժելա Թովմասյանի խոսքով, դեռ իրենց ակումբի վրա հարձակում գործած «Հեղափոխության պահապաններն» են իրեն դատի տվել՝ «5-րդ ալիքում» հարցազրույցի ժամանակ իրենց խուլիգան որակելու համար.
«Իրենք են դիմել դատարան, պատկերացնո՞ւմ եք՝ ուր ենք հասել: Արդեն զավեշտի է վերածվել: Շատ կոնկրետ՝ այս մարդկանց տված է «Նիկոլի թուղթ» ու իրենց կարելի է ամեն ինչ…ե ս շատ զայրացած չեմ, որովհետեւ գիտեմ՝ Նիկոլ Փաշինյանը պանդորայի արկղը բացել է, այնպես որ թող ինքը սպասի, եթե ոչ այսօր, ապա վաղը, եթե այդպիսի այլանդակություններին տալիս ես թուղթ, հնարավորություն, անպատժելիության այս ողջ մեխանիզմը գործում է, ապա շատ շուտ սա թակելու է ձեր դուռը…»:
Անժելա Թովմասյանի ներկայացուցիչ Զարուհի Փոստանջյանն էլ հիշեցրեց՝ ակումբի վրա հարձակման դեպքը տեղի էր ունեցել ուղիղ եթերում, իսկ այդ ուղիղ եթերով ակնհայտ երեւում էին խուլիգանական արարքները, արդարադատության իրականացման դեմ ուղղված ոտնձգությունները, մարդու նկատմամբ խտրական մոտեցումների դրսեւորումը, լրատվամիջոցների աշխատանքի խոչընդոտումը. «Այս 4 հանցակազմերը, որոնք նախատեսված են ՀՀ Քր. օրենսգրքով, այդ ուղիղ եթերով տեսել ենք, իրավապահները պետք է գնահատական տային ու մեղադրյալ ներգրավեին: Բայց առաջին օրվանից զգացինք, որ իրավապահ մարմիններն այս ուղղությամբ չեն ցանկանում լուրջ քննություն իրականացնել, մեղադրանքներ առաջադրել: Ստիպված հարուցեցին միայն լրագրողի օրինական աշխատանքի խոչընդոտմանը վերաբերող մեղադրանք: Մենք միջնորդեցինք այլ հոդվածներով եւս մեղադրանք առաջադրել, մեր միջնորդությունները չմերժվեցին, բայց ասացին՝ այս պահին չենք քննարկում: Երեկ ստացանք լուր. որ քննիչը պատրաստվում է գործը կարճել: Պարզվում է 7 ամսվա ընթացքում մեր քննիչը կատարել է միայն մի քանի գործողություն, գործը մեկ հատորից էր, բայց քննիչը ձգեց յոթ ամիս…երբ որ գործը կարճելու որոշումը լինի, մենք բողոքարկելու ենք այդ որոշումը ընդհուպ մինչեւ ՄԻԵԴ եւ կունենանք հաջողություն, բայց մինչ այդ, այստեղ նահանջ ենք արձանագրում խոսքի ազատության ոտնահարման, մարդու իրավունքների ոտնահարման համատեքստում»:
Կարդացեք նաև
Զարուհի Փոստանջյանի խոսքով, «Հեղափոխության պահապանները» գործում են Նիկոլ Փաշինյանի անմիջական հովանավորչությամբ:
Արփինե ՍԻՄՈՆՅԱՆ
