Հանրապետության նախագահ Արմեն Սարգսյանը, «Ստարտափ Արմենիա» հիմնադրամի նախաձեռնությամբ, այսօր «Ստարտափները կորոնավիրուսից հետո» թեմայով հեռավար զրուցել է հայկական ստարտափ էկոհամակարգի ներկայացուցիչների հետ: Զրույցի ընթացքում նախագահ Սարգսյանը մասնավորապես անդրադարձել է վերջին շրջանում աշխարհում և Հայաստանում նոր կորոնավիրուսի համավարակի հետևանքով ստեղծված իրավիճակին և այդ պայմաններում ստարտափների գործունեությանը:
Պատասխանելով հարցին, թե ինչ է սպասվում համավարակից հետո՝ նախագահ Սարգսյանը նշել է, որ կորոնավիրուսի վտանգը դեռ մնում է: «Կորոնավիրուսը դեռ պարտված չէ. դեռ երկար ժամանակ ապրելու ենք նրա հետ միասին մինչև համապատասխան դեղորայքը կամ պատվաստանյութը հայտնաբերեն: Յուրաքանչյուրի կողմից պետք է պարտականություն դիտվի վարակը չփոխանցել ուրիշի, ավելի տարեց անձանց կամ նրանց, ովքեր ավելի թույլ առողջություն ունեն,-նշել է նախագահը: – Խոսքը բարոյական պարտականության և այլոց հանդեպ հոգատարության մասին է՝ նախ և առաջ մեզնից յուրաքանչյուրի ընտանիքի նկատմամբ: Հետևաբար, խնդրում եմ ձեր վերաբերմունքը ձեր ընտանիքի հանդեպ, որը սրբություն է յուրաքանչյուրիս համար, արտահայտեք պատասխանատու կեցվածքով՝ պաշտպանելով ձեզ, որպեսզի չդառնաք կորոնավիրուսի կրողներ և վտանգի չենթարկեք և՛ մեծերին, և՛ փոքրերին»:
Նախագահն ընդգծել է, որ աշխարհն արդեն փոխվում էր, ուղղակի կորոնավիրուսը սկսեց արագացնել այդ փոփոխության ընկալումը. «Կորոնավիրուսն այն սառը ցնցուղն էր, որը հիշեցնում է, որ աշխարհը փոխվել է, վիրուսներն այսուհետ տարածվելու են շատ արագ՝ քվանտային ձևով»:
Կարդացեք նաև
Խոսելով նոր իրավիճակում ստարտափների դերի մասին՝ նախագահ Սարգսյանը նշել է, որ աշխարհը գնում է այն ուղղությամբ, որտեղ ստարտափների դերը ոչ թե պակասելու, այլ, ընդհակառակը, աճելու է: «Այսինքն՝ կորոնավիրուսից հետո աշխարհը, միևնույն է, գնալու է այն նույն ուղղությամբ, ինչ կորոնավիրուսից առաջ, և, գուցե, ավելի արագ տեմպերով: Մեծանալու է էլեկտրոնային ընկերությունների դերը: Շատերը պարզելու են, որ շատ խնդիրներ լուծելու համար կարիք չկա հավաքվել, այլ՝ վիրտուալ ձևով կարող ենք դա անել: Շատերը հայտնաբերելու են, որ իրենց ընտանիքները հսկայական, մեծ արժեք են, քանի որ այն հայրերը, որոնք առավոտից երեկո վազում են և իրենց երեխաներին չեն տեսնում, հայտնաբերելու են, որ ունեն փայլուն երեխաներ, և նրանց հետ ժամանակ անցկացնելը, նրանց կրթելը նույնպես կարևոր է,-նկատել է նախագահը:- Եզրակացությունը հետևյալն է. այսուհետ ստարտափների դերը շատ կարևոր է լինելու: Խոսքն այն մասին չէ, թե ինչպիսի հարաբերություն կունենա նյութական աշխարհը վիրտուալի հետ, այլ՝ այն մասին, որ միևնույն է, աշխարհը շարունակվելու է փոփոխվել և, միգուցե, ավելի մեծ արագությամբ: Հետևաբար, ստարտափերն այնտեղ մեծ դեր ունեն»:
Նախագահ Սարգսյանը պատասխանել է նաև ստարտափ հանրության ներկայացուցիչների բազմաթիվ հարցերին, որոնք մասնավորապես վերաբերել են կորոնավիրուսի համավարակից հետո հեռանկարային ոլորտներին, ստարտափների հնարավոր աջակցությանը, ինչպես նաև կոնկրետ նախագծերի:
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ ԱՇԽԱՏԱԿԱԶՄԻ ՀԱՍԱՐԱԿԱՅՆՈՒԹՅԱՆ ՀԵՏ ԿԱՊԵՐԻ ՎԱՐՉՈՒԹՅՈՒՆ
Լաւ բաներ է ասում: Ես էլ եմ զգացել, որ շատ հարցեր տեսակապով կարելի է լուծել՝ տնից դուրս չգալով ու հսկայական միջոցներ (նիւթական, ժամանակ) խնայելով:
Երբ համաճարակը հասաւ Նիւ Եորք, ամբողջ կեանքը քաղաքում սառեց՝ ներառեալ մեր համալսարանը:
Երկուշաբթի օր էր, նամակ ստացանք որ պսակավարակի վերաբերեալ Կոլումբիաի համալսարանն ուզում է առցանց գիտաժողով կազմակերպել (աշխարհի լաւագոյն կենսաբանների մասնակցութեամբ): Երկու օրից գիտաժողովն սկսուեց ու արդէն մէկ ամիս է շարունակւում է՝ մօտ 700-900 մասնակցով: Պատկերացնում է՞ք, թէ ի՜նչ ահռելի թիւ է:
Նախկինում 200-300 հոգանոց գիտաժողովի համար կէս տարի, մի տարի շուտ պիտի սկսէինք նախապատրաստուել: Մասնակցութեան վճարը՝ 500-1000$: Մի էդքան էլ օդանաւի փող, մի էդքան էլ հիւրանոցի փող: Եթէ տրանսատլանտիկ թռիչք է՝ մի 3-4 օր էլ «օդերում», յոգնած:
Իսկ հիմա՞. երկու օրում նոյն բանը կազմակերպում ես անվճար, առանց տնից դուրս գալու ու 4 անգամ շատ մասնակցով:
Ասածս ինչ է՝ օգտուէք էս փայլուն հնարաւորութիւնից: Սիրելի՛ հայաստանցիներ (յատկապէս՝ երիտասարդներ), տեսակապով առցանց դասընթացներ կազմակերպէք ու փող աշխատէք (գիտելիք վաճառէք) կամ դուք մասնակցէք դասընթացների՝ լեզուներ սովորէք, մասնագիտութիւն սովորէք (գիտելիք ձեռք բերէք):
Հասկանո՞ւմ էք՝ թուային դարում մարդկանց հաղորդակցութեան սահմանները վերանում են: Այդքանից յետոյ Թուրքիան ու Ադրբեջանը ինչքան ուզում են թող փակ պահեն իրենց սահմանները: