Վարչապետ Նիկոլ Փաշինյանն այսօր ցուցակը ձեռքին զանգահարում էր այն բաժանորդներին, որոնք էլեկտրաէներգիայի պարտքի պատճառով, ըստ այդ ցուցակում եղած տեղեկատվության, հոսանքազրկված են: Զանգահարած առաջին հինգ բաժանորդից միայն մեկ քաղաքացի ասաց, որ բնակարանը հոսանքազրկված է:
Վարչապետը շարունակեց զանգահարել: Կինը, որը պատասխանեց Փաշինյանի հեռախոսազանգին, ասաց, որ միայնակ մայր է, ամուսինը մահացած է եւ այս պահին էլ բնակարանը հոսանքազրկված է՝ պարտքի պատճառով: Փաշինյանը հետաքրքրվեց՝ որ ասել են՝ չեն անջատելու, դրա համա՞ր չեք վճարել: Քաղաքացին նշեց, որ դա էլ է պատճառ հանդիսացել, բայց ավելի շատ անձնական խնդիրներն են եղել պատճառը:
Կինը նշեց, որ երեխան երեք ու կես տարեկան է, կառավարությունից օգնություն էլ չի ստացել, որովհետեւ աշխատող է: Պարտքն, ըստ քաղաքացու 90 հազար դրամ է: Փաշինյանը ցուցակում նշեց, որ այդ դեպքով զբաղվի, այսինքն՝ աջակցի պարտքը մարել:
Բաժանորդներից մեկը հաստատեց վարչապետի տեղեկությունը, ասաց, որ բնակարանը հոսանքազրկված է. «Ունեմ առաջին կարգի հաշմանդամ հայր, երկու անչափահաս տղաներ, ապրում եմ Վարդաշենի հանրակացարանում»:
Կարդացեք նաև
Վարչապետը հետաքրքրվեց՝ կառավարության աջակցության ծրագրերից արդյոք օգտվե՞լ են: Կինն ասաց՝ ոչ, քանի որ ինտերնետ ու համակարգիչ չունեն, երեխաներն անգամ հեռավար դասապրոցեսին չեն կարողանում մասնակցել. «Հունվարից հոսանքն անջատած է, հարեւանից եմ միացրել, մի փոքր իրենց գումար եմ տալու»:
Վարչապետն ասաց, որ այս դեպքն էլ իր մոտ նշեց, որպեսզի հնարավորության դեպքում աջակցի, գոնե երեխաների դասերի հարցը լուծի:
«Երկու երեխաներիս հետ մնացել ենք անլույս, միայնակ մայր եմ, բայց ոչ մի աջակցություն չեմ ստացել, երեխաներիս անունները չկան, որ դիմում ենք այդ օգնությանը, չեն գտնում երեխաների անունները»,-վարչապետի զանգին ի պատասխան ասաց քաղաքացին, որը դեռեւս հունվար ամսից սկսած 140 հազար դրամի էլեկտրաէներգիայի պարտք ունի: Քաղաքացին վստահեցրեց, որ տանը մի հեռուստացույց ունի, լույս ու «գազի կաթսա», որը միայն երեխաներին լողացնելու համար է միացնում, բայց ամսական 56 հազար դրամի սպառած հոսանքի գումար է գալիս: Կինը նաեւ բողոքեց, որ տանը համակարգիչ չունեն եւ երեխաները հեռախոսով թելադրելով են դասերը պարապում: Վարչապետը խոստացավ զբաղվել, որպեսզի երեխաները ստանան իրենց հասանելիք աջակցությունը եւ նաեւ՝ դասապրոցեսի համար տեխնիկայի հարցը լուծել:
Լուսինե ԲՈՒԴԱՂՅԱՆ
