Կորոնավիրուսի տնտեսական հետեւանքները չեզոքացնող կառավարության տնտեսական միջոցառումներից օգտվելու հայտերի 60%-ը բավարարվել է։ Այս մասին այսօր կառավարության մամուլի սրահում ասուլիսին ասաց էկոնոմիկայի նախարար Տիգրան Խաչատրյանը։ Ըստ նախարարի՝ աջակցություն ստանալու հայտերի 40 %-էլ մերժվել է, քանի որ այդ բիզնեսների ոլորտը չի համարվել կորոնավիրուսի հետեւանքով տուժած:
Խաչատրյանը վստահեցրեց՝ 1-ին միջոցառման մեկնարկից մեկ ամսում աջակցությունից օգտվել են 284 կազմակերպություններ, աջակցության ծավալը կազմել է 24,6 միլիարդ դրամ, սրանք այն կազմակերպություններն են, որոնք ունեցել են բարվոք վարկային եւ հարկային պատմություն եւ օգտվել են կառավարության համաֆինանսավորման ծրագրից:
Նախարարի ներկայացմամբ՝ համաֆինանսավորման եղանակով գյուղվարկեր են տրամադրվում 2-րդ միջոցառմամբ, շահառու անձանց եւ կազմակերպությունների թիվը 6000-ից ավելի է, 5500-ը դիմել են մինչեւ 1 միլիոն դրամի վարկավորման համար։
3-րդ միջոցառմամբ էլ վարկեր են տրամադրվում ՓՄՁ-ներին, ըստ նախարարի, շահառուները 549 կազմակերպություններ են, տրամադրվել է 6,3 միլիարդ դրամի վարկեր: Կորոնավիրուսի տնտեսական հետեւանքները չեզոքացնող 5-րդ միջոցառման շրջանակում էլ տրամադրվել է 1,9 միլիարդ դրամի աջակցություն:
Կարդացեք նաև
Ժամկետանց հարկային պարտավորություններ ունեցող տնտեսվարողների համար կառավարությունը որոշում է նախապատրաստել, Խաչատրյանն ասաց, որ այն ուժի մեջ կմտնի այսօր կամ վաղը: Այն վերաբերելու է այն ընկերություններին, որոնք 2019 թվականի դեկտեմբերի 31-ի դրությամբ ունեցել են շատ չնչին գումարով ժամկետանց հարկային պարտավորություն եւ չեն կարողացել օգտվել որեւէ ծրագրից. «Այդ որոշման ուժի մեջ մտնելուց հետո նրանք կարող են որակվել որպես կառավարության աջակցության շահառուներ»:
Նախարարը վստահեցրեց՝ բացառվում է՝ կազմակերպությունը համապատասխանի միջոցառումներից մեկի չափանիշներին եւ մերժվի.«Եթե կազմակերպությունները դիմել են 2-րդ կամ 3-րդ միջոցառման համար, ապա հայտերն ուսումնասիրում են առեւտրային բանկերը եւ ընկերությանը կարող է թվալ, թե իրենք չափորոշիչների սահմաններում են, սակայն առեւտրային բանկը ուսումնասիրի եւ գա այն եզրակացության, որ հայտը ռիսկեր է պարունակում եւ չբավարարի վարկային հայտը: Բանկային համակարգն ընտրվել է հենց դրա համար, որպեսզի ֆիլտր հանդիսանա առավել բարեխիղճ կազմակերպությունների համար»:
Նելլի ԲԱԲԱՅԱՆ
