Դեռ անցյալ տարվա հունվարի վերջին հեռակա բանավեճ սկսվեց Ռուսաստանի դեսպանատան եւ Հեռուստատեսության եւ ռադիոյի հանձնաժողովի նախագահ Տիգրան Հակոբյանի միջեւ: Վերջինս հանրային մուլտիպլեքսից օտարերկրյա հեռուստաալիքները բացառելու անհրաժեշտության մասին հայտարարություն էր արել՝ ասելով, որ դա պետք է անել՝ տեղեկատվական եւ լեզվական անվտանգության նկատառումներից ելնելով:
Դեսպանատունն էլ արձագանքել էր՝ ֆեյսբուքյան էջում գրելով, որ այդ կարծիքն անհեթեթություն է:
Այսօր Տիգրան Հակոբյանը ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի հանձնաժողովում 2019-ի գործունեության տարեկան ամփոփումը ներկայացնելիս անդրադարձավ այդ հարցին:
Խոսելով մալուխային ցանցերի մասին՝ նա ասաց. «Հունվարին աղմուկ եղավ, ՌԴ դեսպանությունը դժգոհություն հայտնեց իմ տեսակետից, որ հանրային մուլտիպլեքսը պետք է ազատ լինի օտար հեռարձակողներից: Սակայն երբ նայում ենք ամբողջ կաբելային ցանցը, տեսնում ենք, որ 400 հեռուստահաղորդում ունենք կաբելային ցանցերում, 209-ը ՌԴ-ի հեռուստածրագրերն են՝ ռուսերեն լեզվով, 57-ը ԱՄՆ-ն է, որից 40-ը էլի ռուսերեն լեզվով են, ամերիկյան ալիքներն են, որ այստեղ ադապտացված են ու հեռարձակվում են ռուսերենով, 67 եվրոպական արտադրանք կա, որից 37-ը էլի ռուսերեն է՝ չհաշված իտալական մի քանի ալիք: Այս առումով ռուսերեն ծրագրերը կազմում են եթերի 81 տոկոսը, 15 տոկոսը հայերեն ու ընդամենը 4 տոկոսը այլ լեզուների: Եվ այստեղ խտրականության մասին խոսելը ՌԴ-ի կամ այլ երկրի նկատմամբ ընդամենը շահարկումներ են, որի վրա կարելի է ուշադրություն չդարձնել»:
Կարդացեք նաև
Նա նաեւ ասաց, որ վերջին մեկ տարում հայերեն լեզվով արտադրանքն ավելացել է 13 տոկոսով, բայց սրա մեջ մտնում են անգամ հնդկական սերիալները, որոնք թարգմանված են հայերեն, այսինքն, պարտադիր չի, որ լինի հենց հայրենական արտադրության:
Հռիփսիմե ՋԵԲԵՋՅԱՆ
