Աշխատանքի եւ սոցիալական հարցերի փոխնախարար Արման Ուդումյանն այսօր ԱԺ առողջապահության եւ սոցիալական հարցերի հանձնաժողովի նիստում երկրորդ ընթերցմամբ քննարկեց «Աշխատանքային օրենսգրքում» եւ «Վարչական իրավախախտումների մասին» օրենսգրքում փոփոխությունների օրինագիծը:
Նախագծի առաջին ընթերցման ժամանակ կառավարությունը զուտ սահմանել էր հեռավար աշխատանքի հնարավորությունը, որի դեպքում աշխատավարձը կվճարվի ամբողջությամբ: Իսկ երկրորդ ընթերցմամբ կառավարությունը աշխատանքային իրավունքների նկատմամբ առաջարկում է վերահսկողական գործառույթ տալ տեսչական մարմնին, որը կարող է ստուգել անգամ չգրանցված աշխատողներին:
ԱԺ տնտեսական հարցերի հանձնաժողովի նախագահ Բաբկեն Թունյանն ասաց, որ նախագիծը պետք է բալանսավորված լինի, որ գործատուների շահերն էլ պաշտպանվեն, ոչ թե մենակ աշխատողների: Ըստ Թունյանի, տեսչական մարմնին շատ գործառույթներ են վերապահվում ու չի կարողանալու իր ռեսուրսներով, օրինակ, չգրանցված աշխատողներին բացահայտի: Նա ասաց, որ ՊԵԿ գործառույթների մեջ են մտնում, «Իմ քայլը» խմբակցության պատգամավոր Հերիքնազ Տիգրանյանն ասաց, որ երկուսի լիազորությունները տարանջատված են, ՊԵԿ-ը չի կարող տալ գործատուին պարտադիր հանձնարարական՝ տվյալ աշխատողի հետ կնքել պարտադիր պայմանագիր, ինչը կարող է անել Աշխատանքի տեսչությունը: Բաբկեն Թունյանն ասաց. «Տեսչական մարմինն այսօր ռեսուրսի խնդիր ունի, հիմա բերել եք էլի մի շատ կարեւոր ֆունկցիա վերագրում եք տեսչական մարմնին: Հայաստանում մոտ 80 հազար գրանցված տնտեսվարող կա, տեսչական մարմինը ո՞նց կարող է նրանց վերահսկել: Կորոնավիրուսի հետեւանքով, երբ մենք միակողմանի ենք դիտարկում աշխատողների իրավունքները ու գործատուներին երկրորդ պլան ենք մղում, ճիշտ չի: Երբ որ ստիպում ենք գործատուին ինչ-որ բաներ անել, մի հատ էլ խստացնում ենք, վերահսկողական ֆունկցիա ենք նշանակում, պիտի մի հատ նայենք՝ այդ գործատուներն այսօր ի՞նչ վիճակում են: Գործատուին կարող է ավելի ձեռնտու լինի աշխատատեղը փակի ու գնա տուն»:
Բաբկեն Թունյանն ընդգծեց, որ նախագծի հիմնական նպատակը կորոնավիրուսն է ու աշխատողների խնդիրը, չգրանցված աշխատողների հարց ի՞նչ կապ ունի, որ բերել, մտցրել են այս նախագծի մեջ. «Ինձ համար անհասկանալի է: Այս նախագիծը պետք է բերվեր այն պահին, երբ հայտարարվեց արտակարգ դրություն: Երկու շաբաթից արտակարգ դրությունը վերանալու է, միայն մի դրույթն է ունենալու հետադարձ ուժ»:
Կարդացեք նաև
Ուդումյանը պատասխանեց, որ նույնիսկ եթե երկու շաբաթ է մնում, անհրաժեշտ է հարցը կարգավորել: Հերիքնազ Տիգրանյանն ասաց, որ այս նախագիծը հետ տալը անթույլատրելի է, գործատուին սրանով ասում են, որ եթե դու չես կարողանում քո աշխատանքը հեռավար կազմակերպես, որի դեպքում աշխատավարձը պետք է աշխատողին ամբողջությամբ վճարես, լուծում կունենաս՝ եթե ֆորսմաժորի ժամանակ աշխատողն ունի չօգտագործած արձակուրդ, նրան տրամադրիր չօգտագործած արձակուրդը: Ըստ Տիգրանյանի, տեսչական մարմինը, չունենալով աշխատակազմ, պայմանագրի առկայությունը կարող է ստուգել:
Թունյանն էլ պատասխանեց. «Ձեր փաստարկները միանշանակ չեն: Եթե միաժամանակ 2000 ահազանգ ստացան, ի՞նչ են անելու: Երկու ամիս առաջ ուրիշ վիճակ էր, հիմա ուրիշ վիճակ է: Երեկ համարս անզգուշաբար հնչեցրել եմ ԱԺ ամբիոնից, մինչեւ այսօր 85 հատ զանգ եմ ստացել: Բա եթե ինձ են այդքան զանգում, տեսչական մարմնին ինչքա՜ն են զանգելու: Եթե 10 ահազանգից 5-ի հետեւից գնաց, 5-ի հետեւից չգնաց, խնդիր է առաջանալու»:
Ինչ վերաբերում է չգրանցված աշխատողներին ստուգելուն, Թունյանն ասաց, որ կարող է պանդորայի արկղը բացեն ու տակից դուրս չգան:
Ի վերջո` որոշեցին, որ նախագծում ամրագրեն՝ եթե չգրանցված աշխատողը գրավոր դիմում գրի տեսչական մարմնին, այդ հարցով կզբաղվեն: Գործող օրենքով, երբ աշխատողները դիմում էին աշխատանքի տեսչական մարմնին, ասում էին՝ մենք լիազորություն չունենք: Հիմա գոնե գրավոր դիմումի առկայության դեպքում կարող ն խնդրով զբաղվել: Նախագիծը դրական եզրակացություն ստացավ:
Հռիփսիմե ՋԵԲԵՋՅԱՆ
