«Գնալով սոցիալական վիճակը ծանրանում է: Վարկ ունեցողները չգիտեն, թե վիճակից ոնց դուրս գան»,-ԱԺ արտահերթ նիստում այսօր «Իմ քայլը» խմբակցության պատգամավոր Սասուն Միքայելյանն ասաց ՀՀ ֆինանսների նախարար Ատոմ Ջանջուղազյանին: Վերջինս նշեց. «Դժվար կլինի միանգամից պատասխանել, թե որ միջոցառման շահառու կարող են լինել նրանք: Եթե ունեն վարկային այնպիսի պատմություն, որը չի բավարարում աջակցության ծրագրերին, դա այլ հարց է»:
Հիշեցնենք, որ խորհրդարանն այսօր քննարկում է 2020թ.-ի բյուջեի նախագծում փոփոխությունները, որոնք ենթադրում են 150 միլիարդ դրամ արտաքին պարտքի ներգրավում՝ կորոնավիրուսի սոցիալ-տնտեսական հետեւանքների վերացման նպատակով:
Նախարարը շեշտեց. «Չենք համարում, որ կառավարության աջակցության միջոցառումներն ավարտված են: Մշտադիտարկումների արդյունքում շարունակում ենք նոր միջոցառումների քննարկումը եւ եղածների փոփոխությունները»:
Ջանջուղազյանի բնորոշմամբ՝ շատերի մոտ ընկալում կա, որ համավարակը հնարավորություն է այս կամ այն միջոցառման շահառու դառնալու, բայց պետք է հաշվի առնել՝ անձը հանդիսանո՞ւմ է համավարակի հետեւանքի կրող, թե ոչ. «Իրավիճակն այլ է, երբ համավարակի հետեւանքով է ձեւավորվել տնտեսվարողի բնութագիր: Ում վրա ազդել է համավարակը, միջոցառումները նպատակ ունեն հասցեական օժանդակելու»:
Կարդացեք նաև
Լուիզա ՍՈՒՔԻԱՍՅԱՆ
