Դրվագներ խորհրդային ամենագեղեցիկ դերասանուհիներից մեկի կյանքից
Լարիսա Կադոչնիկովան համարվում է խորհրդային կինոյի եւ թատրոնի ամենագեղեցիկ դերասանուհիներից մեկը: Նա ռուս հայտնի նկարիչ Իլյա Գլազունովի մուսան էր, Սերգեյ Փարաջանովի ու Յուրի Իլյենկոյի սիրելի դերասանուհին:
Դեռեւս երեք տարի առաջ Կադոչնիկովան նշում էր իր ծննդյան 80-ամյակը: Նա հարցազրույցներից մեկում ասել է, որ չի ցանկանում մտածել տարիքի մասին, այլապես կնմանվի այն տատիկներին, որոնց հաճախ հանդիպում է: Ասել է նաեւ, որ ինքն ապրում է այն սիրո ու ջերմության պաշարի շնորհիվ, որ ստացել է ողջ կյանքում:
Հանուն իր առաջին ամուսնու՝ օպերատոր, ռեժիսոր Յուրի Իլյենկոյի, Լարիսա Կադոչնիկովան թողեց Մոսկվան եւ տեղափոխվեց Կիեւ՝ իր հարազատ թատրոնը փոխելով Կիեւի Լեսա Ուկրաինկայի անվան ռուսական դրամատիկական թատրոնի հետ: Այստեղ խաղացած դերերն էլ նրան ճանաչում բերեցին:
Կարդացեք նաև
Իբրեւ կինոդերասանուհի նա հայտնի դարձավ հատկապես Սերգեյ Փարաջանովի «Մոռացված նախնիների ստվերները» ֆիլմում (1964թ.) խաղացած Մարիչկայի դերով, որտեղ ուկրաինացի աղջնակն ասոցացվում է շեքսպիրյան Ջուլիետի հետ: Լարիսային ու նույն ֆիլմի նրա խաղընկերոջը՝ Իվան Միլոլայչուկին ծափահարեց ողջ աշխարհը: Յուրի Իլյենկոյի «Սեւ նշանով սպիտակ թռչունը» (1971) կրկին փառք բերեց դերասանուհուն, ռեժիսորին ու ողջ ստեղծագործական կազմին:
Կադոչնիկովան ավելի քան 40 դեր է խաղացել ինչպես կինոյում, այնպես էլ թատրոնում: Նրա հայրը՝ Վալենտին Կադոչնիկովը նույնպես դերասան էր, Սերգեյ Էյզենշտեյնի սիրելի սաներից մեկը, իսկ մայրը՝ Նինա Ալիսովան, խորհրդային կինոյի աստղերից էր: Լարիսան երազում էր բալետի պարուհու կարիերայի մասին, սակայն ճակատագիրը նրան կինո տարավ:
Առաջին ամուսնու հետ ծանոթացել է, երբ ընդամենը տասնութ տարեկան էր: Մի ցուցահանդեսի ժամանակ էլ նա ծանոթանում է Իլյա Գլազունովի հետ: Նրանց սիրավեպը սկիզբ է առնում հենց Գլազունովի կնոջ՝ Նինա Վինոգրադովա-Բենուայի աչքի առաջ: Վերջինս մտածում է, որ ամուսնու նոր մուսան դրական կանդրադառնա նրա ստեղծագործական գործունեության վրա: Նա անգամ կազմակերպում է ամուսնու եւ դերասանուհու հանդիպումը, որպեսզի ամուսինը նկարի նրան: Գլազունովը Լարիսայի յոթ դիմանկար է նկարել: Հանրահայտ նկարիչը, որ տարված է Դոստոեւսկու գրականությամբ, Լարիսային համեմատում էր Դոստոեւսկու ճակատագրական կանանց հետ: Երեք տարի անց նրանք բաժանվեցին՝ Գլազունովի որոշմամբ: Լարիսայի հետ լաց եղավ մայրը, բայց ուրախությունից, քանի որ դեմ էր այդ կապին եւ վստահ, որ նկարչի հետ նա ապագա չի կարող ունենալ:
Իլյենկոյի հետ Լարիսան ապրեց տասնութ տարի, նկարահանվեց նրա բոլոր ֆիլմերում: Այնուհետեւ Իլյենկոն տարվեց դերասանուհի Լյուդմիլա Եֆիմենկոյով, ամուսնացավ նրա հետ ու երկու զավակ ունեցավ, մի բան, որ նրան չկարողացավ պարգեւել Կադոչնիկովան:
Բաժանման ցավը մեղմելու համար դերասանուհին սկսեց զբաղվել նկարչությամբ: Երբ նա իր աշխատանքները ցույց տվեց Փարաջանովին, վերջինս ասաց, որ հրաշալի է նկարում: Տարիներ անց Կադոչնիկովան մի անգամ այցելում է Գլազունովի արվեստանոց՝ նկարները ցույց տալու: Նկարիչը դուռը բացելուն պես հարցնում է. «Ինչու ես շալվարով»: Դերասանուհին պատասխանում է, որ նախկին Լարիսան այլեւս չկա: Դա նրանց վերջին հանդիպումն էր:
Դերասանուհու երկրորդ ամուսինը Միխայիլ Սարանչուկն էր, որը ռուսական թատրոնի տնօրենն էր ժամանակին, երբ հանդիպում էր Լարիսայի հետ: Երբ եկավ մի պահ, որ «վերեւներից» առաջարկեցին՝ կամ թատրոնն ընտրել, կամ սիրավեպը, Սարանչուկն ընտրեց սիրելի կնոջը:
Առայսօր դերասանուհին գեղեցիկ արտաքին ունի, ու նույնքան գեղեցիկ կյանքով է ապրում իր ստեղծած աշխարհում: Պատահական չէ, որ 2019-ին PINK UA ուկրաինական սնդուսափայլ ամսագիրն իր առաւջին էջում գերադասեց հրապարակել ավագ սերնդի գեղեցկուհու լուսանկարը՝ ի դեմս Լարիսա Կադոչնիկովայի:
Ըստ kulturologia.ru-ի
Գոհար ՀԱԿՈԲՅԱՆ
«Առավոտ» օրաթերթ
28.04.2020
