Տնտեսագիտության դոկտոր, պրոֆեսոր Էդվարդ Սանդոյանը այսօր վերլուծել է Հայաստանում կորոնավիրուսի տնտեսական հետեւանքները, անդրադարձել տնտեսության պետական կարգավորման խնդիրներին:
Ըստ նրա, այսօր դժվար է ճշգրտորեն կանխագուշակել, թե ինչ կլինի ապագայում եւ որն է համաշխարհային այս աղետի գինը: Սակայն անվանի տնտեսագետը ավելի քան վստահ է, որ խորը ճգնաժամ է սպասվում:
Նրա խոսքով, կառավարության հասարակությանը պաշտպանելու հակաճգնաժամային միջոցառումների արդյունավետության գործունեության գնահատման առումով խառնաշփոթ է եւ պարզ չէ՝ արժեզրկվո՞ղ ակտիվներն ենք փրկում, թե աճող: Կառավարության 14 ծրագրերից ամենահասկանալին սոցիալական աջակցությունն է, որը չի վնասի եւ տարբեր երկրներում կիրառվում է: Սակայն իսկական ճգնաժամն այն է, որ մինչ քննարկումներ են ընթանում, մենք բախվելու ենք փոքր եւ միջին բիզնեսի ճգնաժամին, երբ ամեն մի օրվա ուշացումը բերելու է սնանկացումների: Պարոն Սանդոյանն ահազանգ է հնչեցնում, որ պետությունն առաջին հերթին եւ անհապաղ պետք է անմիջականորեն աջակցի փոքր եւ միջին բիզնեսին:
Աշոտ ՀԱԿՈԲՅԱՆ
