Ավագանու «Լույս» խմբակցության անդամ Թեհմինա Վարդանյանն այսօր Երեւանի քաղաքապետ Հայկ Մարությանին փոխանցեց իր ունեցած տեղեկությունը, որ 500 վերելակի համար հայտարարված մրցույթը խոստացվել է գործարար Սամվել Ալեքսանյանին եւ այդ վերելակները բերվելու են Թուրքիայից: Ապա ասաց՝ հերքեք կամ հաստատեք այս տեղեկությունը:
Մարությանը պատասխանեց՝ եթե այդքան տեղյակ եք, ուրեմն դուք էլ այդ գործի մեջ խառն եք. «Ես, ընդհանրապես, ոչ մի տեղեկություն չունեմ այդ մրցույթներից, դրանք դրվում են եւ մասնակիցները գալիս են պարզ, բաց, թափանցիկ եւ ով առաջարկում է լավագույն պայմանը՝ նա էլ հաղթում է: Պողոս Պողոսյանն է, Փիլիպոս Փիլիպոսյանն է, էս է, էն է, ինձ ընդհանրապես չի հետաքրքրում: Ինձ հետաքրքրում է վերջնարդյունքը՝ որ մեր տված տեխնիկական բնութագրի համաձայն այդ ընկերությունը հանձնի իր աշխատանքը: Մնացածը՝ ինչ եղավ, ոնց եղավ, գնացեք իրար հետ քննարկեք, տվեք առեք, հարցեր տվեք, ի վերջո դուք էլ կարող եք մասնակցել»:
Թեհմինա Վարդանյանը նաեւ ասաց, որ իրեն վարչական շրջանների աշխատակիցները բողոքել են, որ իրենցից ղեկավարությունը գումար է հավաքել եւ ուղղել սոցիալապես անապահով ընտանիքներին եւ կորոնավիրուսի դեմ պայքարի միջոցառումներին:
Հայկ Մարությանն ասաց, որ նման տեղեկատվություն ինքը չունի: Քաղաքապետը հորդորեց այդ վարչական շրջանների անունները հնչեցնել, որպեսզի ղեկավարներին հարցնեն, սակայն Վարդանյանը հրաժարվեց: Վարչական շրջանների ղեկավարները, որոնք ներկա էին քաղաքապետի հետ ավագանու անդամների հարցուպատասխանին, նշեցին, որ նման դրամահավաք չի եղել ոչ մի վարչական շրջանում: Քաղաքապետը կրկին հորդորեց բարձրաձայնել վարչական շրջանների անունները, որպեսզի գոնե վերահսկողական ծառայությանը հանձնարարեն զբաղվի, բայց Թեհմինա Վարդանյանը կրկին հրաժարվեց՝ նշելով, որ իրեն լուրեր են հասել, որ իրենց կամ ընդդիմադիրներին «լայքելու» համար մարդկանց բանավոր նկատողություն են տալիս եւ չի կարող «գործ տալ» ու մարդկանց փաստի առաջ կանգնեցնել:
Կարդացեք նաև
Հայկ Մարությանն ի պատասխան ասաց՝ «Ձեր լեզվի պաշարը նման չէր, ժամանակին «Ելքի» ավագանու, այլ, ավելի շատ ՀՀԿ-ի ավագանու՝ «գործ տալ» եւ այլն բառապաշարին: Բայց, եթե ուզում եք օգնած լինեք քաղաքապետարանին եւ իսկապես գործողություններ լինեն՝ հասկանալու համար ինչպես է եղել, գոնե մեկ վարչական շրջանի անուն գրեք, որ գնանք ու հասկանանք ՝ եղել է նման բան թե՝ չի եղել: Այլապես հարցերը բարձրացնելով միայն չեն լուծվի»:
Լուսինե ԲՈՒԴԱՂՅԱՆ
