Այսօր աշխարհում կա նոր կորոնավիրուսի դեմ պայքարի չորս մոդել. շատերն արդեն հիվանդացել են, բայց տեղյակ չեն (Սթամֆորդի մոդել), միեւնույն է՝ բոլորն էլ հիվանդանալու են (Շվեդական մոդել), անհրաժեշտ է բուժել հիվանդության հենց սկզբում, ամիսներով հետազոտելու ժամանակ չկա, այնպես որ եկեք բուժենք ձեռքի տակ եղած դեղամիջոցներով (Ֆրանսիայի մոդել): Վերջին մոդելը, որում գտնվում է համաշխարհային տնտեսության եւ բնակչության մեկ երրորդը, լոկդաունն է (կարանտինը), որից պետք է աստիճանաբար դուրս գալ:
Տնտեսական գիտությունների թեկնածու, ՌՀՌ ամբիոնի դոցենտ, ՀՀ էկոնոմիկայի նախկին նախարար Արմեն Եղիազարյանը այս տարբերակները բավականին մանրամասն վերլուծել է եւ ներկայացրել հաշվարկների արդյունքները:
Նրա հետազոտությունները ցույց են տալիս, COVID 19-ի տարածման տեմպերն աշխարհում ամեն օր նվազում են եւ արդեն կարելի է կանխատեսումներ անել: Ըստ այդմ, աշխարհում համավարակը կշարունակվի մինչեւ հունիսի 18-ը: Կմահանա մոտ 1 միլիոն մարդ՝ վարակվածների մոտ 7 %-ը, իսկ վարակվածների ընդհանուր թիվը կկազմի մոտ 15 մլն. մարդ: Կարեւոր է, որ ըստ էության համավարակի վերջը երեւում է:
Պարոն Եղիազարյանի կարծիքով, կորոնավիրուսի տարածման արագության վրա ազդում է երեք հիմնական գործոն. երկրներ, որոնք գտնվում են վիրուսի տարածման ավարտական փուլում, երկրներ, որոնք գտնվում են ավարտական փուլին մոտ եւ երկրներ, որոնք գտնվում են վիրուսի տարածման փուլում: Շվեդիան եւ Բելառուսը կարանտինի ռեժիմ ընդհանրապես չեն սահմանել: Շվեդիան գտնվում է ավարտականին մոտ փուլում եւ կարելի է կանխատեսել, թե երբ կավարտվի, իսկ Բելառուսը, որ շատ նման է Ռուսաստանին, դեռ այդ փուլում չէ: Նա որպես մեկ խումբ համեմատել է Շվեդիան, Իտալիան, Գերմանիան, ԱՄՆ-ը, որի մեջ նաեւ Հայաստանն է, եւ Ռուսաստանն ու Բելառուսը:
Կարդացեք նաև
Եթե համարենք, որ բոլոր այն օրինաչափությունները, որոնք գործում են Շվեդիայում եւ Բելառուսում, գործում են նաեւ մյուս երկրներում, ապա համավարակի տարածման եւ մահացությունների նվազման համեմատությունը ցույց է տալիս, որ դա կարող էր լինել նաեւ առանց կարանտին հայտարարելու:
Աշոտ ՀԱԿՈԲՅԱՆ
