Նոր տեսակի կորոնավիրուսը չի հաջողվի արմատախիլ անել, ինչպես տեղի ունեցավ ատիպիկ թոքաբորբի պարագայում: Ինչպես հաղորդում է Bloomberg գործակալությունը, նման հայտարարությամբ հանդես են եկել չինացի բժիշկները, որոնք կարծում են, որ COVID-19-ն ավելի շուտ կվերածվի սեզոնային հիվանդության, ինչպես օրինակ հարբուխն է:
Չինացի բժիշկների խոսքով՝ քիչ հավանական է, որ նոր վիրուսը կանհետանա այնպես, ինչպես 17 տարի առաջ անհետացավ ատիպիկ թոքաբորբը, քանի որ COVID-19 –ով վարակվածների մի մասի մոտ հիվանդությունն անցնում է առանց ախտանիշների: Այս փաստը դժվարեցնում է հիվանդության տարածման ամբողջական կանխումը, քանի որ ախտանիշներ չունեցող հիվանդները կարող են վարակել մյուսներին՝ չիմանալով այդ մասին: Իսկ ատիպիկ թոքաբորբն ուղեկցվել է հստակ ախտանիշներով, հիվանդների մեկուսացումից հետո վիրուսը դադարել է տարածվել:
Այժմ Չինաստանում, որտեղ համաճարակը վերահսկողության տակ է գտնվում, ամեն օր բացահայտվում են կորոնավիրուսով վարակված տասնյակ մարդիկ, որոնց մոտ ախտանիշներ չկան:
Պատրաստեց՝ Վիկտորյա ԱՆԴՐԵԱՍՅԱՆԸ
