«Լուսավոր Հայաստան» խմբակցության ղեկավար Էդմոն Մարուքյանն առաջարկում է սոցիալապես անապահով ընտանիքներին 100 հազար դրամ տալ ու կրկնապատկել կենսաթոշակառուների մեկ ամսվա թոշակը: Ըստ նրա, կառավարությունը ժողովրդի փողը չի ցանկանում տալ ժողովրդին, այս պահին բյուջեում կա 389 մլրդ դրամ:
Այսօր ԱԺ-ում լրագրողների հետ ճեպազրույցում ԱԺ փոխնախագահ Ալեն Սիմոնյանը պոպուլիզմ որակեց Մարուքյանի այդ առաջարկը. «Եթե դա մենք անում ենք, վաղը, մի ամիս հետո ին՞չ ենք անելու: Բացենք ամբողջ պահուստային ֆոնդը բաժանենք մարդկանց: Այն պնդումը, որ դա շրջանառվելու է, մտնելու է տնտեսության մեջ, իրականությանը չի համապատասխանում: Դա պոպուլիզմ է, շատ լավ է հնչում: Ես էլ առաջարկում եմ ոչ թե 100, այլ 150 հազար դրամ տալ կամ երեք անգամ տալ: Դա շատ լավ է հնչում»:
Դիտարկմանը, որ դուք պաշտոնյա եք, ձեր աշխատավարձը ստանում եք ու շատ հեշտ եք հիմա խոսում, Ալեն Սիմոնյանը հակադարձեց՝ ասելով, որ իրենց աշխատավարձը, հազարավոր առիթներ են լինում, բաժանում են մարդկանց, կարիքավորներին. «Եկեք այլեւս չկախվենք աշխատավարձի մասին խոսակցություններից: Ես չգիտեմ, թե լրատվամիջոցների տարբեր խմբագիրներ ինչքան աշխատավարձ են ստանում ու դա ինձ չի հետաքրքրում: Իսկ պաշտոնյաների աշխատավարձը հայտարարագրվում է, ի տարբերություն ԶԼՄ-ների խմբագիրների, որոնցից շատերը ծրարով գումարներ են ստանում»:
Հետո Ալեն Սիմոնյանը հավելեց, թե չորրորդ իշխանության ներկայացուցիչները բանուգործը թողած՝ զբաղվում են հաշվելով, թե ով ինչ է անում, մինչդեռ ժամանակին չեն հաշվել. «Դա իրենց խնդիրն է, հասարակությունն իրենց գնահատականը տալիս է»:
Կարդացեք նաև
Վարչապետն ասել էր, որ հիմա չեն կարողանում տեղորոշել սոցիալապես անապահովներին, որոնց հոսանքը, գազը անջատել են: Ալեն Սիմոնյանն ասաց, որ այսօր իր ընտրատեղամասում մի քանի տեղ է մտնելու ու փորձելու է ինքն անձամբ տեղորոշել, խնդրին լուծում տալ:
Հռիփսիմե ՋԵԲԵՋՅԱՆ
