Ապրիլի 25-ին դատարանը որոշում կայացրեց 2 ամսով կալանավորել «Մուլտի գրուպ» ընկերության տնօրեն Սեդրակ Առուստամյանին։ Առուստամյանի պաշտպան Հովիկ Սուքիասյանը «Հրապարակին» փոխանցեց, որ դատարանը կալանավորումը պատճառաբանել է նրանով, որ Առուստամյանը կարող է թաքնվել եւ խոչընդոտել նախաքննությանը, սակայն որեւէ հիմք որոշման մեջ բերված չէ։ «Բացարձակ որեւէ հիմնավորում չկա, դատարանն իր որոշման մեջ 2 բան է գրում՝ կարող է թաքնվել, կարող է խոչընդոտել, բայց որեւէ տվյալ, որեւէ հիմք, թե ինչու է ինքն այդ համոզման եկել, ինչ մտավախություն ունի, որեւէ հիմնավորում չկա։ Այսինքն՝ դատարանն ուղղակի գտնում է, որ այդպես է պետք, բայց թե դրա տակ ինչ փաստ կա․․․ Որոշումը պետք է լինի ողջամիտ, պետք է բխի գործի նյութերից, որեւէ տվյալ պիտի ներկայացված լինի, որը դատարանին կհամոզի, որ մարդը կարող է թաքնվել վարույթն իրականացնող մարմնից կամ նախաքննությանը կարող է խոչընդոտել, որեւէ փաստ չկա դրված։ Գոնե տեղեկություն լիներ՝ փաստը մի կողմ»,- ասաց Առուստամյանի պաշտպանը։
Սուքիասյանն ասաց, որ Առուստամյանին մեղադրում են կաշառք տալու մեջ, բանն այն է, որ Առուստամյանը փոխառությամբ գումար է տվել 2 անձի, սակայն գումարի տոկոսները, ըստ մեղադրանքի, չի ստացել, ինչն էլ քննչական մարմնին եզրահանգելու առիթ է տվել, որ դա կաշառք է։ «Դա քաղաքացիաիրավական հարաբերություն է, այդ պայմանագրերը կան, օբյեկտիվ իրականության մեջ գոյություն ունեն, կան այդ պայմանագրերը երկարաձգելու համաձայնագրերը՝ կողմերի փոխադարձ համաձայնությամբ։ Այսինքն՝ այդ պայմանագրերը մինչ օրս գործում են, ունեն իրավական արժեք, կողմերի միջեւ հակասություններ չկան, քաղաքացիաիրավական վեճ չկա։ Մեղադրում են կաշառք տալու մեջ եւ դրա հետ փոխկապված փողերի լվացում։
Հիմնականը կաշառք տալն է։ Ասում են՝ քանի որ փոխառության գումարներն ու տոկոսները չեք ստացել, դա նշանակում է, որ Դուք կաշառք եք տվել, բայց թե ինչի համար պետք է կաշառք տրվեր, ինչ գործողություններ են կատարվել ի նպաստ իրեն եւ իր ղեկավարած ընկերության, որեւէ փաստ չկա, տրամաբանական որեւէ կապ չկա այս ամենի մեջ»,- ասաց Սուքիասյանը՝ հավելելով, որ դեռեւս չգիտի, թե ինչ ընթացք կստանա գործի քննությունը, բայց այն դրվագով, որով մեղադրում են, կարծում է, որ որեւէ հանցակազմ չկա։ Սուքիասյանը նաեւ ասաց, որ այս մեղադրանքը որեւէ կերպ կապված չէ նախորդ 2 մեղադրանքների հետ․ «Սա առանձին դրվագ է»։ Սուքիասյանին հարցրինք՝ փոխառությամբ գումար վերցրած անձինք գուցե պետական պաշտոնյանե՞ր են՝ նկատի ունենալով, որ սովորաբար կաշառք է համարվում պետական պաշտոնյային ինչ-որ ծառայության դիմաց տված գումարը։ «Փոխառողները 2 անձինք են, որոնք պետական ծառայության մեջ չեն գտնվել, իրենք ասում են, թե, իբր, միջնորդավորված է եղել։ Մեկ այլ շատ կարեւոր հանգամանք․ այդ փոխառության գումարները փոխանցվել են բանկային հաշվեհամարների, ամեն բան շատ պարզ երեւում է, որ կա փոխառության պայմանագիր եւ այդ պայմանագրի հիման վրա կատարված բանկային փոխանցումներ, որեւէ հանգամանք թաքցված չէ Սեդրակ Առուստամյանի կողմից»։
Չնայած փաստաբանը խուսափում է անուններ հնչեցնելուց, սակայն մենք տեղեկացանք, որ խոսքը Գագիկ Խաչատրյանի մասին է։ Տարիներ առաջ Առուստամյանը փոխառություն է տվել Խաչատրյանի որդուն՝ ԱՄՆ-ում տուն գնելու ժամանակ։ Այդ փոխառությունը պատշաճ ձեւակերպված է։ Այն երկու անձի միջեւ քաղաքացիաիրավական հարաբերություն է, սակայն նախաքննության մարմինը ենթադրություն է արել, որ Առուստամյանը քողարկված կաշառք է տվել ՊԵԿ նախագահին։ Պարզապես հասկանալի չէ, թե ինչու էին կաշառքը «փաստաթղթավորում», եւ ինչ գործողություն է կատարել դրա դիմաց Խաչատրյանը, որի օրոք ՊԵԿ-ը բազմիցս ստուգումներ է արել «Մուլտի գրուպ»-ում, տուգանքներ դրել, պատժել ընկերությանը։
Կարդացեք նաև
Կորյուն ՍԻՄՈՆՅԱՆ
Հոդվածն ամբողջությամբ՝ «Հրապարակ» թերթի այսօրվա համարում:
