2016թ.-ի ապրիլյան ռազմական գործողությունների հանգամանքներն ուսումնասիրող հանձնաժողովի նիստում այսօր հանձնաժողովականների հարցերին պատասխանեց գեներալ-լեյտենանտ, ապրիլյան դեպքերի դրությամբ Արցախի ՊԲ հրամանատար Լեւոն Մնացականյանը:
«Տվել եմ բոլոր այն հարցերի պատասխանները, որոնք հուզել են հանձնաժողովին: Ցանկացած հարց ստացել է պատասխան: Եղել ենք անկեղծ եւ անմիջական, ներկայացրել իրականությունը, որը եղել է ապրիլյանի ժամանակ»,-լրագրողների հետ զրույցում հայտարարեց նա:
-Եղե՞լ են բացթողումներ, որոնք կարող էին էական նշանակություն ունենալ ռազմական գործողությունների ընթացքի վրա:
-Իհարկե ոչ: Միանշանակ, պաշտպանության բանակը կատարել է իր առջեւ դրված խնդիրը, հաղթանակել է: Առկա թերությունները, իհարկե… ցանկացած տեղում էլ անելիք կա: Մենք այդ ուղղությամբ աշխատում ենք:
Կարդացեք նաև
-Օպերատիվ հետախուզական տվյալների պակաս, խնդիր եղե՞լ է:
–Այդ առնչությամբ դեռեւս չպատասխանեմ: Հարցեր կան, որոնք դեռ պետք է ճշտվեն, դա արդեն հանձնաժողովը կորոշի: Եթե կարիք լինի ներկայացնելու, կներկայացվի:
-Ճակատագրական սխալներ եղե՞լ են:
-Մենք մեր խնդիրը կատարել ենք, ի՞նչ ճակատագրական սխալի մասին է խոսքը:
-Հարյուրից ավելի զոհ է եղել…
-Հարյուրից ավելի զոհ չի եղել ապրիլի 2-5-ը: Այդ օրերին եղել է 75 զոհ, որից 35-ը՝ ժամկետային զինծառայողներ:
-Եթե հնարավոր բացթողումները հանձնաժողովը պետք է ներկայացնի, ինչո՞ւ նախկին իշխանության օրոք այդ հարցերը չէին արծարծվում:
-Կա ՊԲ-ի եւ գլխավոր շտաբի վերլուծական: Պարզապես չի հանրայնացվել: Դրա հետ կապված որոշումներ կան, որոնք ընթացքի մեջ են:
-Ի վերջո, 400 հեկտար ենք կորցրե՞լ, թե՞ 800: Սերժ Սարգսյանն ասել էր 800, հետո՝ 400:
-Մեր հաշվարկով՝ մինչեւ 400 հեկտար:
–Այդ դեպքում ինչո՞ւ էր ասում 800:
-Հաջողություն ձեզ…
-Ինչո՞ւ ազատվեցիք ՊԲ հրամանատարի պաշտոնից:
-Երկու տարի անցել է, նորից այդ թեմային եք գնում… Որոշումն այդ է եղել, այդպես է նպատակահարմար համարվել:
-Ձեր բացթողումը ո՞րն է եղել:
-Իմ մասով էլ կա բացթողում, որը հրամանատարը հաշվի է առել:
Լուիզա ՍՈՒՔԻԱՍՅԱՆ
