Aravot.am-ը ՓՄՁ ոլորտի ներկայացուցչից հարց էր ստացել՝ ինչպե՞ս պետք է ապրեն այն ընտանիքները, որոնց կերակրման միջոցը ավտոլվացման կետն է, սակայն այդ բիզնեսը կարանտինի պատճառով չի աշխատում, սակայն այդ ՓՄՁ-ն չի կարողանում օգտվել կառավարության աջակցության որեւէ ծրագրից: Քաղաքացին նշել էր՝ ո՛չ հինգերորդ ծրագրի շահառու են, քանի որ այս պահին մեկ աշխատակից ունեն, ոչ առաջին ծրագրից, որովհետեւ վարկ չեն կարող վերցնել, ո՛չ էլ պարապուրդում գտնվելու 68 հազար դրամ աջակցությունից:
Այս հարցին ի պատասխան, որը փոխանցել էինք այսօր կառավարության մամուլի սրահում ասուլիս հրավիրած էկոնոմիկայի փոխնախարար Նաիրա Մարգարյանին, նախարարի մամուլի խոսնակ Աննա Օհանյանն ասաց՝ ավտոլվացման գործունեությունն այս պահին արգելված գործունեության տեսակ չէ. «Տնտեսական գործիքները հիմնականում ուղղված են այն ոլորտներին, որոնք այս պահին տուժում են փակ լինելու հանգամանքից»:
Նշենք սակայն, որ ավտոլվացման բիզնեսը մեկ ամսից ավելի փակ է եղել եւ պարետի որոշմամբ արգելված գործունեության տեսակների շարքում էր, եւ քաղաքացու հարցը այդ ժամանակաշրջանին էր վերաբերվում:
Լրագրողները Նաիրա Մարգարյանին փոխանցեցին նաեւ գյուղատնտեսների բողոքները, որոնք դժգոհել էին՝ բանկերը գյուղվարկերի տրամադրումը ձգձգում են: Հարցին արձագանքեց Աննա Օհանյանը՝ նշելով, որ բանկերն աշխատում են խիստ ծանրաբեռնված ռեժիմով եւ գյուղատնտեսական վարկերի պահանջարկը մեծ է. «Այս պահին բանկերը մեծաքանակ դիմումներ են ստանում»:
Կարդացեք նաև
Այն հարցին՝ հիմնականում ինչի՞ պատճառով են մերժվում բիզնեսի դիմումները եւ արդյոք կա՞ վերջնաժամկետ, Նաիրա Մարգարյանը պատասխանեց, որ վերջնաժամկետ սահմանված չէ. «Մենք աշխատում ենք սպասարկել բոլոր այն շահառուներին, որոնք դեռ չեն դիմել: Հատկապես՝ հաշվի առնելով, որ ոլորտներն ընդլայնում ենք, սպասում ենք, որ դիմումների նոր ալիք կլինի»:
Իսկ թե հիմնականում ինչ պատճառաբանությամբ են մերժվում, փոխնախարարն ասաց՝ դիմում են այն ոլորտները, որոնք ներգրավված չեն ծրագրերում, երկրորդը՝ հարկային բարվոք պատմություն չունենալու պատճառով, երրորդը՝ շրջանառության պատճառով, քանի որ այն կամ 24 միլիոնից ցածր է կամ 500 միլիոնից բարձր:
Լուսինե ԲՈՒԴԱՂՅԱՆ
