Այս օրերին իտալական լրատվամիջոցները անդրադարձել են Հայոց ցեղասպանության 105-րդ տարելիցին: Mediaset Tgcom24 հեռուստաալիքի եթերում այլ լուրերի թվում անդրադարձ կատարվեց նաև ցեղասպանության տարելիցին. «Մեկուկես միլիոն մարդ, այդ թվում ավելի քան հազար մտավորական, սառնասրտորեն բնաջնջվեց և անգթորեն կոտորվեց նրանց կողմից, որ մինչ օրս այդ կոտորածի մասին խոսում են առանց այն իր անունով կոչելու՝ հրաժարվելով արտասանել «ցեղասպանություն» բառը»: Լրագրողը մեջբերում է նաև Մեծի Տանն Կիլիկիո Արամ Ա կաթողիկոսի խոսքից մի hատված. «Ցեղասպանությունը մեր արյան մասն է կազմում, մենք այն չենք մոռանում, բայց պատրաստ ենք ներել: Ներումը մեր հավատքի մասն է, բայց դա տեղի կունենա, երբ կլինի այս կոտորածի ամբողջական ճանաչումը»:
Այս թեմային են անդրադարձել նաև մի շարք թերթեր:
Il Corriere della Sera թերթը «1915 թ.-ի ապրիլի 24-ին սկսվում էր Հայոց ցեղասպանությունը» վերնագրով հոդվածում անդրադարձ է կատարում ցեղասպանությանը՝ ներկայացնելով բազմաթիվ պատմական փաստեր: Հոդվածում խոսվում է նաև մի շարք հասարակական և մշակութային գործիչների մասին, որոնք հանդես են եկել Թուրքայի ժխտողական քաղաքականության քննադատությամբ: Լրագրողը նշում է Հրանտ Դինքին, Օրհան Փամուկին, ինչպես նաև Էլիֆ Շաֆաքին և ընդգծում նրանց իրականացրած գործունեությունը հանուն ցեղասպանության ճանաչման: Նշվում է նաև, որ բազմաթիվ ֆիլմեր են նկարահանվել այս թեմայով, ինչպես օրինակ Ա.Արսլանի վեպի հիման վրա նկարահանված «Արտույտների ագարակը» կամ ծագումով թուրք ռեժիսոր Ֆաթիհ Աքինի «Սպի» ֆիլմը:
Հոդվածն ամփոփվում է փաստելով, որ շատ երկրներ դեռ չեն ընդունել ցեղասպանությունը. «Չնայած բազմաթիվ երկրների աջակցությանը՝ հայերի ցեղասպանությունը դեռևս չի հանդիսանում համընդհանուր ճանաչում ստացած փաստ: Բավական է մտածել Ամերկայի Միացյալ Նահանգների նման գերտերության երկիմաստ վերաբերմունքի մասին. չնայած Օբամայի վարչակազմի կողմից իրականացված նախնական զրույցներին և այն փաստին, որ 2019 թ.-ին հայոց ցեղասպանության ճանաչման մասին նախաձեռնությունը հավանության արժանացավ թե Ներկայացուցիչների պալատի, թե Սենատի կողմից, այս խնդիրը մնում է դեռ չլուծված»:
Կարդացեք նաև
Il Messaggero թերթը նույնպես անդրադարձել է ցեղասպանության տարելիցին՝ ընդգծելով նաև այն փաստը, որ ավանդաբար իրականացվող միջոցառումների մի մասը այս տարի չեղարկվել է համավարակի հետևանքով, և մարդիկ չեն կարողացել իրենց հարգանքի տուրքը մատուցել զոհերի հիշատակին: Թերթը գրում է. «Կորոնավիրուսի պատճառով հայոց ցեղասպանության 105-րդ տարելիցի հիշատակի միջոցառումները նույնպես մեծամասամբ վիրտուալ տիրույթում են և իրականացվում են սոցիալական ցանցերի միջոցով: Առաջին անգամ չեղարկվել է մայրաքաղաքում կազմակերպվող ավանդական ջահերով երթը, ինչպես նաև փակ էր Ծիծեռնակաբերդի հուշահամալիրի մուտքը»:
Հոդվածում խոսվում է նաև այն մասին, որ միջոցառումները մեկնարկել են եկեղեցու զանգերի ներքո, երբ մարվել են փողոցների լույսերը: Թերթը գրում է. «Մայրաքաղաքը թաղվեց մթության մեջ, երբ բնակիչները նույնպես անջատեցին իրենց տների լույսերը, շատերն էլ վառեցին մոմեր կամ հեռախոսների լապտերներ»:
Անի ՎԱՐԴԱՆՅԱՆ
