«105 տարի անց ցեղասպանությունը վերապրածների սերունդները վճռականությամբ պահանջում են արդարություն եւ ցեղասպանության ճանաչում: Սրա պատգամն այն է, որ ցեղասպանությունն այնքան խորը վերք է եւ վնաս՝ մի ամբողջ ժողովրդի համար, որ դրա չճանաչված լինելը եւ արդարության ժխտումը մնում են որպես խորը վերք»,-«Հայաստանի մանուկներ» բարեգործական հիմնադրամի սոցցանցային ուղիղ միացմամբ այսօր հայտարարեց ՀՀ ԱԳ նախարար Զոհրաբ Մնացականյանը:
«Արդարությունը վերականգնելու վճռականությունը չի նվազել: Սա պատգամ է բոլոր ժողովուրդներին, որ ցեղասպանության կանխարգելումը չափազանց կարեւոր է: Մենք դեռեւս պայքարում ենք ցեղասպանության արդարացման եւ ժխտողականության դեմ: Անպատժելիությունը բերում է նրան, որ ըստ պոտենցիալ ցեղասպանի՝ ինքը կարող է անպատիժ մնալ»,-համոզմունք հայտնեց նախարարը:
Նրա խոսքով. «Մյուս պատգամն այն է, որ մենք այս օրը հաղթած ենք: Պետություն եւ պետականություն ստեղծելով՝ մենք ստեղծել ենք նաեւ հզոր համակարգ՝ պաշտպանելու եւ զարգացնելու մեր ինքնությունը: Նոր սերնդի համար սա կարեւոր պատգամ է: Մենք, որպես ցեղասպանություն վերապրած ժողովուրդ, միջազգային հանրության առաջ պարտավորություն ունենք ամրապնդելու այն անհրաժեշտ քայլերը, որոնք ուղղված են ցեղասպանությունների եւ յուրաքանչյուր զանգվածային ոճրագործությունների կանխարգելմանը: Խտրականության եւ ատելության դեմ պայքարելու նշանակությունը չափազանց էական է ազգային եւ միջազգային մակարդակում»:
Նախարարը շեշտեց, որ ցեղասպանության կանխարգելումը ՀՀ արտաքին քաղաքականության կարեւոր օրակարգային հարցերից է. «Ցեղասպանության վտանգը գոյություն ունի: Մեր հիշողության մեջ ցեղասպանություններ եղել են նաեւ 15 տարի առաջ, օրինակ՝ Ռուանդայում: Կրոնական եւ էթնիկ փոքրամասնություններն այսօր են վտանգված են: Միջազգային հանրությունը պարտավոր է բոլոր ջանքերը ներդնել՝ վաղ շրջանում նման զարգացումները կանխարգելելու համար: Սա դեռեւս բացարձակ հաջողություն ունեցած նպատակ չէ, որովհետեւ վտանգն այսօր էլ կա»:
Կարդացեք նաև
Լուիզա ՍՈՒՔԻԱՍՅԱՆ
