Ուկրաինայի ԱԳ փոխնախարար Վասիլի Բոդնարը նամակով դիմել է ուկրաինացի պաշտոնյաներին` կոչ անելով զերծ մնալ Հայոց ցեղասպանություն եզրույթի կիրառումից: Այս մասին սոցիալական ցանցում հաղորդել է Ուկրաինայի Գերագույն Ռադայի պատգամավոր Դարյա Վոլոդինան` գրառմանը կցելով նամակի պատճենը: Նամակում, մասնավորապես ասվում է, որ Ուկրաինան չի ճանաչում հայ ժողովրդի ցեղասպանությունը, ուստի դիվանագետը ուկրաինացի պաշտոնյաներին խնդրում է զերծ մնալ Հայոց ցեղասպանության 105-րդ տարելիցի կապակցությամբ ոգեկոչման միջոցառումներին մասնակցելուց և հրաժարվել «Ցեղասպանություն» տերմինն օգտագործելուց:
Վոլոդինան նշել է, որ չի կարող լռել` որպես Հայաստանի հետ բարեկամության խմբի փոխնախագահ: «Իմ ունեցած տեղեկություններով` նմանատիպ «երջանկության նամակներ» արտգործնախարարությունը ուղարկում էր պետական կառույցներ դեռևս Պորոշենկոյի ժամանակներից, և որքան հասկանում եմ, փոխնախարարը որոշել է շարունակել այդ ավանդույթը: Եվ բացարձակապես կարևոր չէ, որ այդ երկրում հեղափոխություն է տեղի ունեցել, որ այնտեղ (Հայաստանում-խմբ.) նոր բարեփոխումներ են իրականացվում և որ այս նամակի տարածման հենց նախօրեին Ռուսաստանի ղեկավարության հետ սկանդալ է տեղի ունեցել: Մենք համառորեն շարունակում ենք որպես «Կրեմլի լրտես» պիտակավորել արդեն նաև այլ երկրների»,-գրել է պատգամավորը:
Պատգամավորը կարծում է, որ Ուկրաինայի ԱԳՆ-ն պետք է զերծ մնա նմանատիպ նամակներից և հիշեցրել է, որ Հայոց Ցեղասպանությունը ճանաչել են այնպիսի երկրներ, ինչպիսիք են ԱՄՆ-ը, Ֆրանսիան, Կանադան, Գերմանիան, Իտալիան, Նիդերլանդները, Չեխիան, Շվեդիան, Շվեյցարիան, Հունաստանը, Պորտուգալիան և այլն: Նրա խոսքով` Հայաստանի հետ միջխորհրդարանական հարաբերությունների հարցերով խորհրդարանական խմբի անդամները մտադիր են առաջ քաշել նամակը հետ կանչելու պահանջ, և հնարավոր է ծառայողական քննություն անցկացվի:
Պատրաստեց՝ Վիկտորյա ԱՆԴՐԵԱՍՅԱՆԸ
