Գեղարքունիքի մարզի Վահան գյուղում երկու օր առաջ տեղի ունեցած սպանությանը գյուղում ոչ մեկը չի հավատում:
«Մանկության ընկերներ էին, դասընկերներ, շատ մտերիմ ընկերներ: Ոչ մեկը չգիտի՝ ինչ խնդիր է առաջացել, ու ոչ մեկը չի էլ հավատում, որ նման բան կարող էր լինել: Առավոտից իրիկուն իրար հետ էին, սպանվածն ամեն օր իրենց տնից ճաշ էր տանում, որ այդ մարդը սոված չմնա, դե տանը միայնակ էր»,- Aravot.am-ին պատմեց Վահան համայնքի ղեկավար Արշակ Մկրտչյանը:
Նրան հայտնի չէ, ինչու էր սպանություն կատարած անձը զինված նռնակներով փախուստի դիմել, պրն Մկրտչյանը ենթադրեց միայն. «Երեւի սպանել է, հետո զղջացել, փախել: Երկու հատ նռնակ են հայտնաբերել մոտը: Այդ մարդուց նման բաներ չէինք սպասում, մի քիչ ծանր բնավորություն ուներ, այդքան բան: Չափավոր ալկոհոլ էր օգտագործում»:
Ըստ մեր զրուցակցի՝ սպանության համար մեղադրվողը միայնակ էր ապրում, բայց 5 դուստր ունի, ամուսնալուծված էր. «Սպանվածը դեպքի օրը հյուրընկալվել էր նրա տանը: Սպանվածը նորմալ, հավասարակշռված մարդ էր, ընտանիքի հայր, լավ գյուղացի: Այսօր թաղումն է»:
Կարդացեք նաև
Համայնքապետն ասաց, որ սպանության վարկածներ էլ չեն շրջանառվում գյուղում, որովհետեւ բոլորն անակնկալի են եկել կատարվածից, իսկ սպանության մասին հենց սպանություն կատարած անձն է հայտնել. «Ինքն է անմիջապես իր տան բանալիները տարել շրջկենտրոն՝ ընկերոջը տվել, ասել, թե այսպիսի բան եմ արել, տար ոստիկանության բաժին, բայց այդ մարդուն չի ասել՝ ինչու է սպանություն կատարել»:
Արփինե ՍԻՄՈՆՅԱՆ
