Հայաստանի Եվրոպական կուսակցությունն իր վրդովմունքն ու բացարձակ անհամաձայնությունն է հայտնում այս օրերին ՀՀ Հանրային ծառայությունների կարգավորող հանձնաժողովի (ՀԾԿՀ) եւ «Գազպրոմ Արմենիա» ՓԲԸ-ի միջև տեղի ունեցած հանցավոր գործարքի վերաբերյալ, համաձայն որի ՀՀ բնակչությանը փաստացի հետևյալ վերջնագիրն է ներկայացված՝ «ապրիլի 22-ից հետո 3 օրվա ընթացքում վճարում չկատարած բնակիչ-բաժանորդների գազամատակարարումը սահմանված կարգով կդադարեցվի»։
ՀԵՎԿ-ը հակապետական եւ հակաժողովրդական ցինիկ դավադրություն է համարում Հայոց Եղեռնի եւ Հայրենազրկման 105-րդ տարելիցի նախօրեին, միջազգային տնտեսական ճգնաժամի պայմաններում, գազի եւ նավթի աննախադեպ գնանկման դեպքում նման անմարդկային ու լկտի պահանջը։ Եթե «Գազպրոմ Արմենիա» ՓԲԸ-ն, լինելով ռուսական «Գազպրոմի» 100-տոկոսանոց դուստր ձեռնարկությունը, գործում է իր պետության գաղութային շահերի տրամաբանությամբ, ապա միանգամայն անհասկանալի եւ անընդունելի է ՀՀ Հանրային ծառայությունների կարգավորող հանձնաժողովի ս․թ․ ապրիլի 22-ի որոշումն առ այն, որ «կոմունալ ծառայությունների դիմաց վճարման պարտավորության կատարմանը խոչընդոտող ֆորս մաժորը համարվում է վերացած»։ Հենց ՀԾԿՀ-ի սույն որոշման հիման վրա է «Գազպրոմ Արմենիա» ՓԲԸ-ն վերջնագիր ներկայացրել ՀՀ ազգաբնակչությանը՝ զուգորդելով այն արդեն իսկ միջազգային արժեքից հինգ-վեց անգամ բարձր գազի գինը եւս մեկ երրորդով բարձրացնելու լկտի պահանջով։
ՀԵՎԿ-ը համարում է, որ շարունակվող համավարակի, մեկուսացման, գործազրկության, եկամուտների եւ ֆինանսական պետական աջակցության բացակայության պայմաններում ֆորս մաժորը վերացած համարելու ՀԾԿՀ-ի եւ նրան հովանավորող ՀՀ կառավարության որոշումն անհիմն է եւ անհեթեթ։ ՀՀ բնակչությունը չի կարող եւ չպետք է ենթարկվի օտար պետության շահերը ներկայացնող կառույցի նման «գազային հարձակմանը», այն էլ ՀՀ կառավարության համաձայնությամբ։ ՀԵՎԿ-ը համարում է սա Ռուսաստանի կողմից Հայաստանի ու Արցախի ներքին քաղաքական իրավիճակի ապակայունացման եւ մեր երկրի վերջնական գաղութացման հերթական դրսևորում։
Հայաստանի Եվրոպական կուսակցությունը դիմում է ՀՀ կառավարությանը հետեւյալ պահանջներով.
Կարդացեք նաև
– սանձել «Գազպրոմ Արմենիա» ՓԲԸ-ի լկտի պահվածքը,
– բանակցություններ սկսել ՌԴ կառավարության հետ «Գազպրոմի» մենաշնորհն ապահովող 2013 թ․ պայմանագրի վերացման եւ ՀՀ մատակարարվող գազի ու նավթի արժեքի վերանայման մասին՝ համաշխարհային շուկայի գներին համապատասխան,
– բանակցություններ սկսել Իրանի կառավարության հետ ՀՀ մատակարարվող գազի եւ նավթի ծավալների ավելացման մասին,
– խստորեն պատժել ՀԾԿՀ ղեկավարությանը անպատասխանատու եւ հակապետական գործունեության համար։
ՀԵՎԿ-ն իրավունք է վերապահում այս պահանջների անտեսման դեպքում դիմել ՀՀ բնակչությանը կոչով՝ չենթարկվել ՀԾԿՀ եւ «Գազպրոմի» շանտաժին եւ չվճարել ավազակային գներով հաշվարկած վարձերը։
Հայաստանի Եվրոպական կուսակցություն
