«Ամերիկայի ձայն» ռ/կ. Թրամփի վարչակազմը հանդես է եկել դեպի ԱՄՆ ներգաղթն առնվազն 60 օրով դադարեցնելու մասին հրահանգով: Խոսքը հատկապես այստեղ բնակություն հաստատելու նպատակ ունեցող անձանց ու ընտանիքների մասին է: Նախագահը հայտարարել է, թե այսպես կոչված «գրին քարթերի» հատկացումը ժամանակավորապես կասեցնելու նպատակը կորոնավիրուսի տարածման այս ժամանակահատվածում ամերիկացիներին պաշտպանելն է:
Սպիտակ տունը դեռեւս չի հրապարակել նշված ծրագրի մանրամասները: Սակայն Թրամփն ասել է, թե հրահանգը չի տարածվելու մի շարք, օրինակ` սեզոնային աշխատանքներ կատարող անձանց վրա:
Ոչինչ չի ասվում այն մասին, թե արդյոք դադարեցնելու մասին հրահանգը վերաբերում է «գրին քարթի» համար դիմող բոլոր անձանց, թե միայն նոր դիմորդներին: Խոսք չի գնում նաեւ այն մասին, թե արդյոք այդ հրահանգը տարածվում է ընտանիքների վերամիավորման համար դիմող անձանց, թե ոչ:
Արդյո՞ք ներգաղթը կասեցնելու մասին հրահանգը տարածվում է նաեւ առողջապահական համակարգում աշխատելու նպատակով H-1B տիպի վիզայի համար դիմող անձանց, թե ոչ, որոնք արդեն պատրաստվում էին դիմել «գրին քարթ» ստանալու համար: Այս հարցի պատասխանը եւս չի տրվում, այն դեպքում, երբ ԱՄՆ-ի առողջապահական համակարգում բժիշկների 28 եւ բուժքույրեր-բուժակների 15 տոկոսը ներգաղթյալներ են:
Կարդացեք նաև
Նախագահն այս պահին ունի առողջապահական դրդապատճառներով ներգաղթի օրենքներում փոփոխություններ իրականացնելու արդարացում: Բացի այդ, երկրի Գերագույն դատարանը վերջերս էր հայտարարել, որ ճամփորդությունների վրա Թրամփի հաստատած արգելքը չի ոտնահարում սահմանադրությունը: Սա եւս Թրամփին տալիս է գործելու ազատություն:
Ինչ վերաբերում է ժողովրդին, ապա նրանց մեծամասնությունը հավանություն չի տալիս այս ծրագրին: Նրանք կարծում են, որ Թրամփի այս քայլն ունի քաղաքական դրդապատճառներ:
Նախընտրական այս ժամանակաշրջանում Թրամփը հաճախ է հպարտանում, հայտարարելով, որ Չինաստանից հունվար ամսին ճամփորդությունները դեպի ԱՄՆ կրճատելու մասին իր արձակած հրահանգը որոշիչ դեր է ունեցել մեծաթիվ մարդկանց կյանքեր փրկելու գործում:
