Վրաստանի նախկին նախագահ, Օդեսայի նախկին նահանգապետ Միխեիլ Սաակաշվիլին պատասխանել է Ուկրաինայի պաշտոնը զբաղեցնելու առաջարկին, որն արվել է իշխող կուսակցության կողմից: Այս մասին Սաակաշվիլին գրել է իր ֆեյսբուքյան էջում:
«Ինձ համար մեծ պատիվ է նախագահ Զելենսկուց բարեփոխումների գծով փոխվարչապետ դառնալու առաջարկ ստանալը: Ես նաև շատ բովանդակալից և օգտակար զրույց եմ ունեցել վարչապետ Շմիգալի հետ, որի ընթացքում մենք մանրամասնորեն քննարկել ենք կառավարությունում իմ հնարավոր աշխատանքի հետ կապված բոլոր հարցերը,- »,-գրել է Սաակաշվիլին:
Սաակաշվիլին հիշեցրել է, որ Ուկրաինայի ընտրությունների ժամանակ աջակցել է գործող նախագահ Վլադիմիր Զելենսկուն, և մեծ հույսեր է կապում վերջինիս թիմի հետ: Նա նաև հավելել է, որ մեծ պատասխանատվությամբ է մոտենում առաջարկին և իր որոշմանը: «Առջևում մեզ շատ բարդ ժամանակաշրջան է սպասվում՝ ինչպես տնտեսությունում, այնպես էլ երկրի կյանքում առհասարակ: Մեզ այժմ անհրաժեշտ է ինչպես երբևէ խիզախ լինել մեր որոշումներում և բարեփոխումներում»:
Սաակաշվիլին հույս ունի, օգտագործելով իր միջազգային փորձը, բարձրացնել Ուկրաինայի հեղինակությունը և երկրի ինտեգրումը միջազգային կառույցներին:
Կարդացեք նաև
Ուկրաինական ԶԼՄ-ների հաղորդմամբ` Վլադիմիր Զելենսկին հանդիպել է Սաակաշվիլիի հետ: Ուկրաինայի նախագահը հավատացած է, որ Օդեսայի նախկին նահանգապետն ունի անհրաժեշտ ներուժ` կառավարությանն աջակցելու համար:
Պատրաստեց՝ Վիկտորյա ԱՆԴՐԵԱՍՅԱՆԸ
