«Նա վիրավորեց լրագրողներին՝ իր գործընկերներին: Ինչու եմ ասում՝ գործընկերներին, որովհետեւ նա մինչեւ հիմա շարունակում է լրագրությամբ զբաղվել եւ անանուն հոդվածներ տեղադրել «Հայկական ժամանակ»-ում»,-«Հայելի» մամուլի ակումբում լրագրողների հետ հանդիպմանն այսօր հայտարարեց բլոգեր, տեղեկատվական անվտանգության փորձագետ Տիգրան Քոչարյանը՝ անդրադառնալով վարչապետ Նիկոլ Փաշինյանի այն պնդմանը, որ նախորդ իշխանությունից փող է ստացել ԶԼՄ-ների 99%-ը:
Տիգրան Քոչարյանը նշեց. «Ես գիտեմ առնվազն երկու լրատվամիջոց, որոնք իշխանությունից փող չէին ստանում, ստանում էին արտասահմանյան գրանտներ, եւ նրանք հաստատ այդ մեկ տոկոսն են: Արդյոք սա նշանակո՞ւմ է, որ Փաշինյանն ու իր լրատվամիջոցը գումար են ստացել իշխանությունից: Ըստ օդում կախված տեղեկությունների՝ «Հայկական ժամանակ»-ի ողջ տպաքանակը երկար ժամանակ գնվում էր՝ անկախ նրանից՝ վաճառք կա՞ր, թե ոչ: Արդյոք սա չի նշանակո՞ւմ, որ նա գումարներ է ստացել պետությունից կամ պետականամերձ կառույցներից»:
Լուիզա ՍՈՒՔԻԱՍՅԱՆ
