Այսօր ԱԺ ճեպազրույցի ժամանակ «Իմ քայլը» խմբակցության պատգամավոր, 2016 թվականի ապրիլին ծավալված ռազմական գործողությունների հանգամանքներն ուսումնասիրող քննիչ հանձնաժողովի նախագահ Անդրանիկ Քոչարյանին հարցրեցին՝ չե՞ք պատրաստվում հանձնաժողով կանչել վարչապետ Նիկոլ Փաշինյանին՝ հասկանալու, թե ՌԴ-ի դերակատարությունը որն էր այդ պատերազմում:
Նա պատասխանեց. «Այս պահի դրությամբ հանձնաժողովի քննարկումների արդյունքում մենք չենք տեսել, որ պետք է կանչել ՀՀ վարչապետ Նիկոլ Փաշինյանին միայն այն պարզ պատճառով, որ Նիկոլ Փաշինյանն այդ ժամանակ չի եղել իշխանության կրող: Եթե նա որեւէ տեսակետ է հայտնել, այդպիսի տեսակետներ արտահայտել են նաեւ շատ քաղաքական գործիչներ»: Անդրանիկ Քոչարյանն ասաց, որ հնչեցրած տեսակետներն ուսումնասիրում են ու եթե կարիք է լինում ճշտելու, դա անում են այն մարմիններից, որոնք իրավասու են եղել, դա ՊԲ-ն է, ՊՆ-ն է:
Լրագրողները նաեւ հարցրեցին՝ դուք ասացիք, որ հետախուզության հետ կապված խնդիրներ են եղել, պատրաստվո՞ւմ եք նորից կանչել Արշակ Կարապետյանին, որը ապրիլյան դեպքերի ժամանակ եղել է ՀՀ ԶՈՒ գլխավոր հետախուզական վարչության պետ: Անդրանիկ Քոչարյանը պատասխանեց. «Եթե հանձնաժողովը դրա կարիքը գտնի, կկանչի, որովհետեւ ինքներդ էլ հասկանում եք, որ Սերժ Սարգսյանին լսելուց հետո հանձնաժողովում նորից կարծիքներ կարող են լինել, որ այն զինվորականները, որոնք եղել են, նորից կարող է հարցերի պատասխանեն»:
Այդ առումով Քոչարյանը կարեւոր համարեց ԶՈՒ գլխավոր շտաբի նախկին պետ Յուրի Խաչատուրովի գալը. «Սերժ Սարգսյանը համոզվեց, որ հանձնաժողովում քաղաքական դրդապատճառներով որեւէ հարց չի տրվել, տրվել են միայն պրոֆեսիոնալ, ճիշտ հարցադրումներ, որոնց իրավասու է պատասխանել այդ ժամանակվա գերագույն գլխավոր հրամանատարը: Մեր աշխատանքը շատ ավելի լիարժեք կլինի, եթե համար մեկ զինվորականն իր մեջ ուժ գտնի գա հանձնաժողով: Եթե ինքը իր մեջ ուժ է գտել եւ գնացել է ինչ-որ ֆիլմում տեսակետներ է ասել, իսկ այդ ֆիլմը իրավական առումով որեւէ արժեք չի ներկայացնում, եթե կարողացել է ֆիլմում նկարագրել իրողություններ, պետք է կարողանա նաեւ սահմանադրության պահանջով ստեղծված քննիչ հանձնաժողովի աշխատանքներին մասնակցել: Եվ թեկուզ այդ նույն բաները գա հանձնաժողովում ասի եւ պատրաստ լինի լսել հանձնաժողովի անդամների պրոֆեսիոնալ հարցադրումները, որը տեսավ նաեւ այն ժամանակվա իր հրամանատար Սերժ Սարգսյանը»:
Կարդացեք նաև
Հռիփսիմե ՋԵԲԵՋՅԱՆ
