Մամուլի ազատության հարցերով ԵԽԽՎ համազեկուցող Շտեֆան Շեննախը մտահոգված է մամուլի ազատության սահմանափակումներով` կորոնավիրուսի համավարակի համատեքստում:
Նա ընդգծել է, որ առողջապահության ներկայիս ճգնաժամը հարվածել է ամբողջ աշխարհին, այդ թվում Եվրոպայի խորհրդի անդամ պետություններին, ուստի ստեղծված իրավիճակում չափազանց կարևոր է մամուլի դերը:
«Համավարակի զարգացումների վերաբերյալ տեղեկատվությունը պետք է լինի ճշգրիտ և հուսալի և անհապաղ ներկայացվի հանրությանը… Այսօրվա ճգնաժամի համատեքստում մամուլի ազատությունը և լրագրողների անվտանգությունը չափազանց կարևոր է: Չնայած դրան Եվրոպայի Խորհրդի անդամ մի շարք երկրների կառավարություններ փորձում են փորձում են իրենք ձևավորել առողջապահական ճգնաժամի մասին մամուլի լուսաբանումները: Կեղծ տեղեկատվությունից խուսափելու պատրվակով, նրանք կանխում են թափանցիկությունը, լռեցնում քննադատներին: Ավելի վատ է, որ որոշ երկրներում համավարակը պատրվակ է դարձել կառավարությունների համար ընդունելու օրենքներ, որոշումներ, հրահանգեր, որոնք կարող են բացասական ազդեցություն ունենալ մամուլի ազատության վրա և սահմանափակեն լրագրողների աշխատանքը նույնիսկ ներկայիս ճգնաժամից հետո: Իրավական հիմքով նման փոփոխություններ են տեղի ունեցել Հունգարիայում, Թուրքիայում, Ադրբեջանում, Բոսնիա-Հերցեգովինայում, Ռումինիայում, Հայաստանում և Ռուսաստանում»,- ասվում է ԵԽԽՎ համազեկուցողի հայտարարության մեջ:
Նրա խոսքով` նման սահմանափակումների հետևանքները կարող են լուրջ ազդեցություն թողնել մամուլի ազատության վրա: Շեննախը ԵԽ անդամ երկրների իշխանություններին կոչ է արել զերծ մնալ մամուլի ազատության սահմանափակումներից, քանի որ համավարակը չպետք է դառնա մամուլը գրաքննության ենթարկելու պատրվակ:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
