Մարալիկիում կորոնավիրուսով վարակված անձանց թիվն ավելացավ ևս 8-ով՝ հասնելով 18-ի։ Մարալիկի առողջության կենտրոնի բուժանձնակազմից թեստավորվել էին 61 հոգու, որոնցից 8-ի թեստի պատասխանը եղել էր դրական։ Այս մասին Aravot.am-ին տեղեկացրեց Շիրակի մարզպետ Տիգրան Պետրոսյանը։
«Այս պահին տեղի է ունենում կոնտակտավորների շրջանակի մեկուսացում ու պարզում։ Այն անձանց, որոնց թեստերի պատասխանները ընթացքում բացասական են եկել, նրանց ինքնամեկուսացման ցուցում է տրվել, Մարալիկում այդ շղթաների հետ աշխատում է «Հիվանդությունների վերահսկման և կանխարգելման կենտրոն»-ը՝ զսպելու համար»,-ասաց մարզպետը։
Հիշեցնենք, որ 3 օր առաջ Մարալիկի առողջության կենտրոնից 10 բուժաշխատողի, այդ թվում գլխավոր բժշկին, կորոնավիրուս հիվանդությամբ տեղափոխել էին Գյումրու ինֆեկցիոն հիվանդանոց։ Մարալիկի առողջության կենտրոնի աշխատակիցներին մասսայաբար թեստավորելու պատճառը եղել էր այն, որ նրանցից մեկի մոտ, որը մեկուսացման մեջ էր գտնվում, հայտնաբերվել էր կորոնավիրուս։
Նունե ԱՐԵՎՇԱՏՅԱՆ
