Հանրային գրասենյակի փաստաբան, պաշտպան Լ.Ավետիսյանի տեղեկացմամբ, միջին ծանրության հանցանքներ կատարած պաշտպանյալի` Գարիկ Զաքարյանի նյութական վիճակը պաշտպանական կողմին թույլ չտվեց հանդես գալ նրա նկատմամբ կիրառված խափանման միջոց կալանավորմանն այլընտրանքային խափանման միջոց՝ գրավ կիրառելու միջնորդությամբ:
Թիվ ԵԴ/0241/01/17 քրեական գործով ամբաստանյալ Գարիկ Զաքարյանի նկատմամբ որպես խափանման միջոց ընտրվել էր կալանավորումը: Հանրային գրասենյակի պաշտպանը միջնորդություն էր ուղարկել Երեւան քաղաքի ընդհանուր իրավասության դատարան, կալանքը փոփոխելու եւ որպես խափանման միջոց չհեռանալու մասին ստորագրություն ընտրելու մասին։
Ապրիլի 15-ին Երեւան քաղաքի ընդհանուր իրավասության դատարանի դատավոր Վարդան Գրիգորյանը Եվրոպայի խորհրդի խոշտանգումների եւ անմարդկային կամ արժանապատվությունը նվաստացնող վերաբերմունքի կամ պատժի կանխարգելման եվրոպական կոմիտեի մարտի 20-ին հրապարակած զեկույցի համաձայն, բավարարեց ընդհանուր 16 դրվագով մեղադրվող, ամբաստանյալ Գարիկ Զաքարյանի պաշտպանի միջնորդությունը (Զաքարյանին մեղադրանք է առաջադրվել 12 դրվագ ՀՀ քրեական օրենսգրքի 177 հոդվածի 1-ին մասով, մեկ դրվագ ՀՀ քրեական օրենսգրքի 176 հոդվածի 1-ին մասով, 2 դրվագ ՀՀ քրեական օրենսգրքի 177 հոդվածի 2-րդ մասի 2-րդ կետով եւ 1 դրվագ ՀՀ քրեական օրենսգրքի 177 հոդվածի 2-րդ մասի 3-րդ կետով նախատեսված հանցավոր արարքներ կատարելու համար-Ռ.Մ.):
Ըստ պաշտպանի միջնորդության՝ առաջադրված մեղադրանքում Գարիկ Զաքարյանն իրեն մեղավոր է ճանաչել, տվել է ինքնախոստովանական ցուցմունքներ, որով օժանդակել է նախաքննությանը՝ օբյեկտիվ իրականությունը պարզելու համար: «Առավոտին» պաշտպանը երեկ տեղեկացրեց, որ անցյալ տարվա սեպտեմբերի 18-ի դատավճռով Գարիկ Զաքարյանը դատապարտվել է 3 տարի 9 ամիս 5 օր վերջնական ժամկետով ազատազրկման, նրա նկատմամբ ընտրված խափանման միջոց ստորագրությունը՝ չհեռանալու մասին, փոխվել էր կալանավորմամբ:
Կարդացեք նաև
Կալանավորը գտնվում էր ԱՆ «Դատապարտյալների հիվանդանոց» ՔԿՀ-ում: Նշված քրեական գործով օրինական ուժի մեջ մտած դատավճիռ չկա եւ, ըստ էության, Գարիկ Զաքարյանը համարվում է կալանավորված անձ:
Բացի Եվրոպայի խորհրդի մարտի 20-ին հրապարակած զեկույցի պահանջների, «Դատապարտյալների հիվանդանոցում» պատիժը կրող Գարիկ Զաքարյանը տառապում էր մի շարք ծանր հիվանդություններով, մասնավորապես՝ նա ճանաչվել էր զինվորական ծառայության համար ոչ պիտանի, իսկ 2019թ. ապրիլի 5-ի բժշկասոցիալական փորձաքննության թիվ 1388568 որոշման համաձայն, ճանաչվել է 3-րդ խմբի հաշմանդամ։
Գարիկ Զաքարյանի մոտ «Միքայելյան վիրաբուժական ինստիտուտ» ՓԲԸ-ում դուպլեքս սկանավորման եզրակացությամբ արձանագրվել է՝ աջ ծունկ-ազդրային, ձախ ազդրային սեգմենտի տարած ֆլեբեթրոմբոզ լավ արտահայտված ռեկանալիզացիայով, վարիկոզ տարած թրոմբոֆլեյբիտի նշաններով, վերջույթների լիմֆոստազ, աճուկային շրջանի լիմֆադենոպատիա։ Նույն հիվանդությունը հաստատվել էր «Աստղիկ» ԲԿ-ում, որտեղ նրա մոտ հաստատվել են ստորին վերջույթների երկկողմանի վարիկոզ, տրոմբոֆլեյիտ եւ լիմֆոտազ հիվանդությունները։
Փաստաբանն ասում է. «Գտնվելով «Դատապարտյալների հիվանդանոց» ՔԿՀ-ում, Գարիկ Զաքարյանը առողջության վատթարացման պատճառով բազմիցս տեղափոխվել է քաղաքացիական հիվանդանոցներ, որտեղ ենթարկվել է ստուգումների եւ ստացել է անհետաձգելի բուժօգնություն: Մասնավորապես՝ «2018թ. հունիսի 20-ից մինչեւ 22-ը ստացիոնար բուժվել է «Արմենիա» ԲԿ-ում, որտեղ համաձայն հիվանդության քարտի քաղվածքի, նրա մոտ ախտորոշվել է «Զույգ ստորին վերջույթների հետթրոմբոֆլեյիտիվ հիվանդություն, խառը ձեւ: Ստորին վերջույթների վարիկոզ հիվանդություն: Արտաքին արյունահոսություն երակից ձախ ծնկային հոդի շրջանում», ապա, 2019թ. սեպտեմբերի 15-ից մինչեւ սեպտեմբերի 17-ը ստացիոնար բուժվել է «Սուրբ Գրիգոր Լուսավորիչ» բժշկական կենտրոնում, որտեղ նրա մոտ ախտորոշվել է՝ «աջակողմյան աճուկային ներուղղվող ճողվածք: Ձախակողմյան աճուկային ներուղղված ճողվածք»: Ուղեկցող հիվանդություններ՝ ստորին վերջույթների վարիկոզ հիվանդություն, նաեւ անբուժելի հիվանդություն»:
ՔԿՀ ղեկավարի կողմից 2020թ. փետրվարին դատարանին հայտնվել էր, որ Գարիկ Զաքարյանն ընդգրկված է ծանր հիվանդություններով տառապող անձանց ցուցակում։
Ռուզան ՄԻՆԱՍՅԱՆ
«Առավոտ» օրաթերթ
17.04.2020
