Չինաստանն ընկղմվել է խորը ճգնաժամի մեջ կորոնավիրուսի պատճառով, աշխարհի խոշորագույն տնտեսություններից մեկն ամենալուրջ անկումն է գրանցել ժամանակակից պատմության մեջ, ինչը խնդիրներ կառաջացնի ողջ աշխարհի համար: Ինչպես հաղորդում է BBC-ն, այս մասին վկայում է Covid-19 համավարակի հետևանքների նախնական գնահատումը:
Չինաստանը համաշխարհային գերտերություններից առաջինն ընդունեց վիրուսի հարվածը և առաջինը հաշվետվություն ներկայացրեց տնտեսական հետևանքների մասին, որոնք աննախադեպ են: Երկրի տնտեսությունը տարեկան կտրվածքով կրճատվել է 6,8%-ով: Չինաստանում նման բան չէր եղել 1970-ական թվականներից ի վեր: Չինաստանում գրանցված անկումը ազդելու է երկրագնդի յուրաքանչյուր բնակչի վրա՝ գրում է գործակալությունը:
Չինաստանն այժմ համաշխարհային տնտեսության 17% է, այլ ոչ թե 4%-ը, ինչպես 2002-2003թթ. նախորդ SARS կորոնավիրուսի ժամանակ: Բացի այդ անհամեմատելի են նաև համավարակի մասշտաբները, քանի որ այն ժամանակ ատիպիկ թոքաբորբով վարակվեց ավելի քան 8000 մարդ՝ 26 երկրում, մահացավ՝ շուրջ 800-ը: Իսկ այժմ աշխարհում զոհերի թիվը գերազանցում է 150 հազարը, իսկ հիվանդներինը՝ 2 միլիոնը:
Չինաստանի տնտեսական անկումը խնդիրներ կառաջացնի նաև զարգացած երկրների համար, իսկ ոչ հարուստ և զարգացող երկրների համար իրավիճակն աղետալի կլինի, քանի որ վերջիններս կախվածություն ունեն արտասահմանյան կապիտալից: Institute of International Finance ֆինանսիստների համաշխարհային ասոցիացիայի տվյալներով՝ միայն հունվարի կեսերից, երբ արդեն ուրվագծվում էր Չինաստանում համաճարակի մասշտաբները, զարգացող երկրներից փողի արտահոսքը կազմել է 100 միլիարդ դոլար: Այս առումով Չինաստանը բացառություն է, քանի որ կապիտալի արտահոսք չի լինում, ընդհակառակը, ներհոսք է տեղի ունենում՝ վիրուսի հետ կապ չունեցող ֆինանսական ազատականացման շնորհիվ: Բացի այդ Չինաստանին ձեռնտու է էժանացած նավթը և մետաղները, քանի որ բնական ռեսուրսների խոշորագույն ներկրող է: Չինաստանի տնտեսությունը, այնուամենայնիվ, տուժում է, ուստի հարց է առաջանում՝ ինչ կլինի զարգացող երկրների հետ, գրում է BBC-ն:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
